Wikipèdia:Presa de decision/Estat-Nacion

Un article de Wikipèdia, l'enciclopèdia liura.

Aquesta pagina concernís una presa de decision clausa e doncas protegida. Mercé d'ensajar pas de votar. Mas podètz totjorn votar sus las presas de decision en cors de vòte.

Estat-Nacion Fasa actuala : Vòte Fasa seguenta : Resultats Dins la Tavèrna, de contributors crenhent una deriva del contengut vèrs una vision "francesa", an fach la demanda que se lancèsse una discussion a prepaus de la diferenciacion clara e afirmada entre las nocions d'"Estat" e de "Nacion" dins los articles, las categorias o las infoboxes de la Wikipèdia. An tanben demandat que se respècte la diversitat dels wikipedians occitans, siá qu'apertenon a d'estats diferents (França, Itàlia, Espanha, etc), siá qu'an d'opinions diferentas sus la question nacionala e de saber se cal pas prener Occitània coma ponch de vista primordiau de la Wikipèdia occitana. Dobertura de la discussion : lo 26 de febrièr de 2007 Clausura de la discussion : lo 15 de març de 2007 Començament del vòte : 16 de març de 2007 Fin del vòte : 31 de març de 2007 Resultats : 1èr d'abril de 2007

Wikipèdia:Presa de decision Discussions recentament dobèrtas : Noms de personas Sondatges en cors : Vòtes en cors : Vòte per o contra l'atribucion dels dreches d'administrator a Mertyl Metre a jorn

Vejatz la pagina de las discussions prealablas sus la pagina de discussions associada.

Somari 1 Per 2 Contra 3 Neutre 4 Tèxt somés a la discussion 4.1 Amira occitana dins Wikipèdia

Per

Vòti per, naturalament. I a pas agut de confrontacion e leis opinions diferentas se son explimidas dins un grand respècte mutuau. Pasmens siáu conscient que la discussion es benlèu pas anada pron luenh per trobar un consens pus solid entre lei diferentei sensibilitats. Se jamai la demanda s'exprimís, acceptariáu un relambi suplementari per emendar lo tèxt e li trobar una version pus consensuala.--Aubadaurada 18 de març de 2007 a 14:33 (UTC)

Ara una autra causa: es evident que lo moment es prematurat per votar. Faudriá cercar un consens pus fòrt e faudriá que cadun prepausèsse d'emendaments au tèxt. Tanben siáu d'acòrdi per votar ponch per ponch.--Aubadaurada 20 de març de 2007 a 10:35 (UTC)

Contra

Vòti contra perque pensi que de règlas deurián èsser establidas quand i a de problèmas vertadièrs per la màger part dels contribuidors, çò que me sembla pas lo cas aicí. E que tròp de leis pòdon faire mai de mal (descoratjar, espaurugar, "refrescar" las bonas volontats ...) que de ben. E mai sabi pas çò qu'es un punt de vist occitan (?). Mas tornarai pas dire çò qu'ai dich ja sus la pagina de discussion (representativitat, dubertura, pedagogia, ...). A prepaus, l'autre jorn ai vist un article sus Francés Vairon, sabiái pas qual èra donc aqueste tipe (per curiositat, seriá interessant de saber çò que ne pensa l'interessat)... A lèu. --ThierryM 18 de març de 2007 a 21:00 (UTC) , tanben Tierric, Tierrí o Terric... ;-)

S'agís ben d'un "problèma vertadier" per una partida dei contributors. Poiriás mostrar un pauc de respècte...--Aubadaurada 20 de març de 2007 a 10:35 (UTC)

Adieu a totes e en particular a Aubadaurada al qual respondi (deuriái o faire sus sa pagina mas seguissi lo fial...), Pensavi pas que de donar son vejaire podriá èsser interpretat coma una manca de respècte. Se tornas legir lo meu messatge, notariás per la màger part dels contribuidors (çò que significa pas : per pas cap contribuidor), pensi, me sembla : mots que indican que son sonque las meunas soscadissas, jamai ai pretendut detener una vertat quina que siá e mai doni pas de leiçon de morala. Mas se aver una autra opinion que la d'Aubadaurada es far mòstra de non respècte alara val pas lo còp de discutir. Me dòl que te siás sentit atacat, èra pas cap la tòca mas pensi que dire que soi irrespectuós es un biais un pauc facil de tancar una discussion (quitament se aquela en èra pas una). Per tot aquò, podriái te tornar ton polit compliment. A lèu. --ThierryM 28 de març de 2007 a 09:53 (UTC)

Te voliáu pas vexar Teiric. Mai quand disiás que lo subjècte "es pas important", aquò èra vexant per ieu e per d'autres, comprenes?--Aubadaurada 28 de març de 2007 a 14:09 (UTC)

Neutre

Capsot 18 de març de 2007 a 14:36 (UTC) Tròbi pas gaire clar d'occitanizar sistematicament lo nom de personas 1) que benlèu se sentisson/definisson pas coma occitans 2) que i a pas d'atestacion de l'emplec de la forma occitana de son pichòt nom. Pensi un còp mai que tròp de causas son barrejadas, aguèsse votat favorablament sul critèri estat-nacion-país mas vist que las causas son barrejadas e me vòli pas trobar un jorn amb de Pau Picàs o Josèp Garbaud per respectivament Pablo Picasso o Giuseppe Garibaldi. Sabi pas fins a quin ponch sèm pas a reinterpretar l'istòria. Personalament pensi que la designacion Jaume Chirac es ridicula (sens voler ofendre de cap de mena degun...). Vos saludi totes coralament e bon coratge a totes, felicitacions a totes los que fan d'articles e particularament a Scarf e a ThierryM que fan un trabalh dels mai valents ara (Òsca pels articles sus 1907 encara se son pas completament acabats encara...)

Non, i a ges de barrejadís. Aqueste tèxt sus Estat/nacion parla solament de la classificacion e de la definicion deis apertenéncias nacionalas e estatalas. La question pausada es: qu'es occitan? qu'es pas occitan? Es pas aicí que se règla la forma lingüistica dei noms occitans (aquò se reglava dins la Carta lingüistica). I a ben un barrejadís dei problèmas dins la pagina de discussion, mai pas dins lo tèxt somés au vòte. Sufís de legir lei principis prepausats dins lo tèxt çai sota.--Aubadaurada 18 de març de 2007 a 19:26 (UTC)

Mercés per las precisions, m'èri arrestat sul costat lingüistic de l'afar mas ai doblidat de dire/precisar (dins una amira de far un messatge brèu benlèu) que me geina de definir de personas coma Picasso coma occitanas o tanben francesas... Ensajarai d'èsser mai clar aqueste còp, a mon vejaire los principis del debat barrejan la definicion d'estat/nacion/país e l'atribucion identitària... Personalament me geina de dire de qualqu'un nascut en territòri occitan qu'es occitan; per ieu l'occitanitat implica almens un ligam o una identificacion a la lenga e/o la cultura locala. Aquesta identificacion es un concèpte plan delicat e m'estimi mai de classificar coma occitans los que se definisson aital que d'englobar los autres pels qu'ai pas pro de donadas per jutjar sa percepcion identitària. Es mai aisit pels personatges del passat que la lenga èra mai viva mas actualament pòdes viure dins quina vila importanta (e mens tanben) que siá sens ausir pas res d'occitan e èsser pas en contacte amb la cultura occitana. Lo luòc de naissença pòt èsser accidental e per ieu deuriá pas èsser sinonim d'identitat; albiri que nos podèm sentir d'una realitat autra que la de nòstra naissença e mai de l'estat o país ont vivèm e las imposicions me geinan, coma me geina de me voler far engolir per encausa de ma carta d'identitat que soi francés... Francament, espèri que comprendretz ma decision, mercègi las explicas mas dins un contèxt aital manteni ma posicion neutra. (Pensi que lo tèxt es tròp long e se deurián votar sonque per arguments, valent a dire Argument 1) far la diferéncia estat/nacion/país en definir clarament los concèptes (aquí èri favorable) Argument 2) atribuir una identitat occitana segon quines critèris? (naissença, activisme, rapòrt a la lenga etc...). Bona nuèch a totes, Capsot 18 de març de 2007 a 20:57 (UTC)

Soi d'acòrdi ambe Capsot, benlèu caldrià avançar mai pas a pas, es un pauc indigest... I a de punt que me convenon e d'autres non! Capiti pas d'èsser categoric per l'ensemble de la proposicion. Cedric31 18 de març de 2007 a 21:56 (UTC)

Partegi lo vejaire de Capsot e de Cedric, en particular, en çò que pertòca la definicion d'una persona coma "occitana"; i a d'alhors dins la proposicion una dissimetria que me pareis curiosa, estent qu'un independentista seriá categorizat solament coma occitan (presa en còmpte d'una actitud personala), e que d'autrei (Picasso...) qu'an probablament jamai ren dich sus aquò serián tanben categorizats coma occitans. E de votar per arguments (puslèu que globalament), coma o prepausa Capsot, seriá un metòde fòrça mai clar. Vivarés 18 de març de 2007 a 23:22 (UTC)

Per votar punt per punt --Jiròni 30 de març de 2007 a 19:10 (UTC)

Tèxt somés a la discussion

[Vaicí un tèxt pichon que prepausi per lo debat e per abotir a una presa de decision]--Aubadaurada 4 de març de 2007 a 14:49 (UTC)

Amira occitana dins Wikipèdia

Existisson d'opinions divèrsas sus la natura d'Occitània: per d'unei es una nacion; per d'autres es una comunitat lingüistica e culturala sens dimension nacionala e que se deu inserir dins lei nacions estatalas (França, Itàlia, Espanha...); d'autres estiman qu'es possible de combinar l'apertenéncia a una nacion occitana amb l'apertenéncia ai nacions estatalas; enfin d'unei que i a refusan tota mena d'apertenéncia nacionala (occitana o estatala). Sus aqueu debat, la vocacion de Wikipèdia es pas de prene partit ni d'impausar una vision particulara, mai es de donar au public d'informacions objectivas escrichas lenga occitana, en respectant la diversitat d'opinions dei wikipedians e dei legeires sus la "question nacionala". Per consequent, leis informacions de la Wikipèdia occitana an de se presentar segon lei principis seguents de neutralitat:

• La lenga occitana es la rason d'existir de la Wikipèdia occitana: es un objècte de consens entre lei contributors. Es en partent d'aqueu consens que leis utilizaires d'opinions divèrsas se retròban per desvolopar ensems la Wikipèdia en lenga occitana. Ansin Occitània, coma espaci objectiu d'aquela lenga, es lo ponch de vista prioritari deis articles, deis infoboxes e dei categorias.
  • L'origina geografica occitana dei personas, dei luòcs, deis institucions o de totei menas de subjèctes se presenta en prioritat. Per ex. se presenta Pau Cesana coma un "pintor occitan", se presenta Lemòtges coma una "vila d'Occitània", se presenta la petanca coma "un espòrt d'origina occitana".
  • Quand un subjècte d'article es pas solament d'origina occitana, se presenta sei divèrseis originas en començant per l'occitana. Ex. Pablo Picasso es un "pintor occitan, espanhòu (d'origina), catalan e francés", Léger es un "flume occitan, francés e breton".
  • S'un contributor estima necessari de mençonar l'apertenéncia d'un subjècte a un estat, en mai de son aperténcia occitana, cèrca una formula clara per dire aquela realitat, en començant per l'origina occitana. Ex:
    • "Lei Bocas de Ròse son un departament occitan de França".
    • Un infobox presentant una vila occitana coma Pau pòt indicar d'en primier la categoria "país" = Occitània (eventualament amb la bandiera occitana) e d'en segond la categoria "estat" = França (eventualament amb la bandiera francesa).
    • "Jaume Chirac es un òme politic occitan e francés". Tanben serà simultaneament dins lei categorias "personalitat politica occitana" e "personalitat politica francesa". Valent a dire: J. Chirac es occitan d'origina e a costat d'aquò, revendica son apertenéncia a la nacion francesa e es president de França.
    • S'evitarà de categorizar coma "francesa", "italiana" o "espanhòla" una persona o un grop amb d'opinions independentistas. Ex: "Francés Fontan es un òme politic occitan".
    • Per lei personas, lei grops e autrei subjèctes que se pronóncian pas expressament sus la "question nacionala", cada contributor es liure d'estimar s'es pertinent o non de mençonar son apertenéncia a un estat.
    • Per leis organismes que s'organizan volontariament a l'escala d'un estat, se mençona en prioritat l'aperténcia a aquel estat, e mai se son presents tanben en Occitània. Ex. "RaiUno es un canau de television italian".
• Se demanda ai contributors d'observar la diferéncia de sens entre país, nacion e estat:
  • País designa un territòri de natura variabla e vaga. Se pòt aplicar a una comunitat culturala e lingüistica coma Occitània, o tanben a un estat, a una region, a un parçan, etc.
  • Nacion (amb de mots derivats coma nacionau/-al, nacionalitat) recep de definicions fòrça divèrsas e contradictòrias segon l'opinion de cadun. Per d'unei Occitània es una nacion, per d'autres n'es pas una. Cada còp qu'es indispensable de parlar d'una "question nacionala", lei contributors rendon còmpte de la diversitat deis opinions, amb objectivitat e neutralitat.
  • Estat es au contrari una categoria objectiva e ben definida: es un territòri que possedís una organizacion politica e institucionala comuna e qu'es sobeiran sus la scèna internacionala.
• Dins lei subjèctes que pertòcan Occitània, se demanda ai contributors de tenir còmpte de la diversitat dei quatre estats que cuerbon l'espaci occitan, valent a dire França, Itàlia, Espanha e Mónegue. Lo public occitan de Wikipèdia pòt venir d'aquelei quatre estats e a lo drech de recebre un tractament egalitari de l'informacion. Per exemple:
  • Quand se desvolopa un article sus lei departaments de l'estat francés, tanben es desirable de desvolopar d'articles parallèls sus lei províncias deis estats italian e espanhòu.
  • Un article sus la reglamentacion dei telecomunicacions deu assajar d'explicar lei situacions dei quatre estats.
  • Un bendèu sus lei vilas de pus de 100 000 abitants en França tanben implica de faire un bendèu similar per Itàlia e Espanha, e subretot d'afichar en prioritat un bendèu sus lei vilas de pus de 100 000 abitants en Occitània.
• Lei principis precedents tanben se pòdon aplicar ai minoritats culturalas, etnicas o lingüisticas que son pròchas d'Occitània e que son ben conegudas, coma lei País Catalans, lo Bascoat, Corsega o Bretanha. Per còntra es pas indispensable, ni totjorn possible, de leis aplicar sistematicament a totei lei minoritats dau Mond. Se pòdon aplicar pasmens a de minoritats luenchencas que son pron conegudas dins lei mèdias e dins l'opinion publica occitana coma Tibet o Curdistan.
• Leis aspèctes essencialament lingüistics, coma per exemple la prioritat dau nom occitan (d'una persona o d'un luòc), son explicats dins Wikipèdia:Carta lingüistica.

[apondon dau 16 de març de 2007] Remarca: Apertenéncia regionala - L'apertenéncia a una region (quand fa pas l'objècte d'una revendicacion nacionala particulara) es pas concernida per aquesta question de l'estat e de la nacion; es un subjècte nèutre. Un contributor es liure de mençonar una apertenéncia regionala dins una definicion, dins l'òrdre que vòu: "Pau es una vila d'Occitània, en Bearn" o ben "Pau es la capitala de Bearn, en Occitània". Una categoria d'apertenéncia regionala se tracta pas sus lo meteis plan qu'una categoria d'apertenéncia nacionala. Una categoria d'apertenéncia regionala es particularament pertinenta s'es un concèpte universalament utilizat coma "santons de Provença", "volcans d'Auvèrnhe", "ducs d'Aquitània", "comunas de la Nauta Vinhana", "vampirs de Transilvània", "cidres de Normandia" o "vins de La Rioja".