Sportsklubben Brann

Frå Wikipedia – det frie oppslagsverket

SK Brann
Fullt namn	Sportsklubben Brann
Kallenamn	Rødtrøyene, Bergens Stolthet
Kort namn	SKB
Grunnlagd	26. september 1908
Heimebane	Brann Stadion, Bergen (Kapasitet: 17 890)
Styreleiar	Magne Revheim
Dagleg leiar	Bjørn Dahl
Sportsleg leiar	Roald Bruun-Hanssen
Hovudtrenar	Mons Ivar Mjelde
Ass. trenar	Espen Steffensen
Liga	Tippeligaen
Tippeligaen 2008	?
Heimedrakt 　 Bortedrakt
Noverande sesong

Sportsklubben Brann er ein fotballklubb frå Bergen. Klubben vart skipa i 1908 og tok sitt første seriegull i 1962. I dag har klubben etablert seg som ein av toppklubbane i Tippeligaen og har teke medalje tre av dei fire siste sesongane.

Klubben spelar i dag heimekampane sine på Brann stadion, med ca. 17 800 plassar, i Årstad i Bergen. Treningsanlegget ligg rett ved sidan av stadion der to grasbanar og to kunstgrasbanar vart ferdigstilt til sesongen 2007. Desse banene vart kalla «Nymarksbanane».

Klubben nyttar heimedrakter med raud overdel og kvite shorts, bortedrakter som er heilsvarte og ei tredjedrakt med blå overdel og kvite shorts. Klubben sin utstyrsleverandør er Kappa som inngjekk avtalen med Brann i desember 2006 og vart gjeldande frå 2007-sesongen.

Les meir nedanfor...

Innhaldsliste 1 Historie 1.1 Starten 1.2 Stordomstid 1.3 Elevatorlaget 1.4 Prestasjonar og europeisk suksess 1.5 Opptur og nedtur 1.6 Brann etablerar seg i toppen 1.6.1 2007 - seriegull 2 Tilhengjarar 2.1 Rivalisering 3 Flest mål scora for Brann 4 Flest kampar for Brann 5 Brannspelarar med flest landskampar 6 Vinnarar av Kniksen-prisen 7 Årets Brannspelar 8 Merittar 9 Nokre spelarar gjennom tidene 10 Hovudtrenarar siden 1960 11 Leiing/trenarteam/støtteapparat 12 Rekordar 13 Bakgrunnsstoff 13.1 Litteratur om Brann

[endre] Historie

[endre] Starten

Ski- og Fodboldklubben Brann vart skipa 26. september 1908 av Christen K. Gran og Birger Gjestland. Den første kampen vart spelt mot Bergens Fotballklubb 1. Januar 1909 i ein kamp som endte 1-1. I august same år skulle óg den første sigeren kome. Det skjedde då Stavanger Idrettsforening vart slått 3-2 i Stavanger. Klubben heitte opphavleg Sportsklubben Fart, men namnet vart seinare endra til Sportsklubben Brann.

I løpet av dei ti første åra hadde klubben allereie fått eit namn i fotball-Noreg, og både i 1917 og 1918 nådde klubben cupfinalen, som begge endte med tap.

Sportsklubben Brann sikra seg i 1917 eit 30 mål stort areal, og den 25. mai 1919 stod Brann Stadion klart på Nymark. Den nye stadion vart innvia med kamp mot landslaget som endte i 2-6 tap for Brann.

Brann sitt første nasjonale meisterskap kom i 1923, og eit nytt fulgte to år seinare. Brann vann 2-1 over Lyn i den første finaletriumfen, medan Sarpsborg vart slått 3-0 i finalen i 1925.

Trass i at Brann haldt fram å dominere den lokale fotballen, vart det etter kvart vanskelegare å hevde seg nasjonalt etter at mange av laget sine støttespelarar la opp. Laget kom ikkje lengre enn til kvartfinale dei neste åra og etter 1931 måtte Brann vente til etter krigen før klubben igjen kom så langt.

[endre] Stordomstid

Sportsklubben si verkelege stordomstid kom på 1960-talet med to seriemeisterskap og to av klubben og landet sine største profilar: Roald «Kniksen» Jensen og Rolf Birger «Pesen» Pedersen.

Seriegullet vart innkassert både i 1962 og 1963. I 1964 forlot nøkkelspelarar som Roald «Kniksen» Jensen klubben, og det endte med nedrykk. Klubben var ikkje oppe igjen i den øvste divisjon før i 1968. I 1963-sesongen samla Brann eit gjennomsnittleg tilskodartal på heile 15 486, en rekord som stod fram til Rosenborg passerte han i 2003.

Brann vann Norgesmeisterskapet i 1972 og i 1976 — eit halvt hundreår sidan sist klubben vann meisterskapet. I Cupvinnarcupen i 1973 nådde Brann den andre runden etter å ha slått Gzira frå Malta 9-0 samanlagt i den første runden.

I andre runde vart det nordirske laget Glentoran for sterkt, og vann samanlagt 4-2. I 1977 endte Brann sin ferd i Europa igjen i den andre runden. I første runde vant Brann 5-0 samanlagt over islandske IA Akranes, men den nederlandske klubben Twente vann 4-1 samanlagt runden etter.

[endre] Elevatorlaget

1980-talet var prega av mykje med- og motgang for Brann. Det vart nedrykk i 1979, men dei var oppe igjen neste år. Men dei rykka opp og ned samanhengande frå 1980-86. Brann vart kjend som «elevatorlaget». Brann har vore i den øvste divisjonen sidan 1987. Men det var ikkje berre ille på 1980-talet. Brann vann cupen i 1982 mot Molde; sigersmålet vart scora av legenda Neil McLeod. Brann nådde cupfinalen 2 gonger til på 80-talet, i 1987 og 1988. Begge enda med tap.

[endre] Prestasjonar og europeisk suksess

90-talet var prega av skandalar på styrerommet, varierande resultat på banen og høgt pengeforbruk. Fem trenarar hadde i løpet av 90-talet ansvaret for klubben, og heile styret vart avløyst. Klubben oppnådde likevel gode resultat i serien, med 4. plass i 1996, 3. plass i 1999 og 2. plass i 1997.

I Europacupsamanheng spelte Brann i 1996/1997 sesongen av UEFA sin cupvinnarcup trass i å ha tapt finalen mot Rosenborg. (RBK spelte i den meir prestisjefulle serievinnercupen i staden). I turneringa kom Brann til kvartfinalen etter å ha slått ut det nederlandske storlaget PSV Eindhoven etter 2-1 i Bergen og 2-2 i Eindhoven, men vart til slutt slått ut av Liverpool etter 1-1 heime og 0-3 borte.

[endre] Opptur og nedtur

Brann kom til Champions League for første gong etter at laget kom på andreplass i Tippeligaen 2000. Brann trekte det bulgarske laget Levski Sofia i 2. kvalifiseringsrunde, men etter heiderlege 0-0 på bortebane rauk Brann ut før eventyret byrja med 1-1 på heimebane i returkampen. Avansement var Branns einaste verkelege sjanse til å tene den stadig aukande gjelda, og i tida som følgde vart resultata svakare i takt med at nøkkelspelarar vart selde. Sommaren 2002 sto Brann ribba for profilar etter at Harri Ylönen, Svante Samuelsson, Azar Karadas, Raymond Kvisvik og Thorstein Helstad hadde forlate klubben. Få trudde på medalje dette året, men svært få hadde nok sett for seg kvalifisering mot Sandefjord om retten til å spele i Tippeligaen 2003. Men Brann heldt på plassen etter 0-0 borte og 2-1 heime. Like etter trekte trenar Teitur Thordarson seg, og han vart etterfølgd av assistentrenaren sin, den gamle Brannspelaren Mons Ivar Mjelde.

[endre] Brann etablerar seg i toppen

Trenarskiftet førte til ein ny giv i heile klubben, og i tida som fulgte finansierte Bergensbedrifter og rike velgjerarar nye spelarar til klubben, samtidig som Brann fekk sletta den store gjelda si hos Handelsbanken ved å selge 51% av Brann Stadion AS til Stor-Bergen Boligbyggelag. Mjelde leia «nye» Brann til bronse og cupmeisterskap i 2004 då Brann slo Lyn 4-1 i finalen. Det var Brann sin første tittel på 22 år. Bengt Sæternes vart den store helten i finalen med tre mål.

Etter ein middelmådig sesong i 2005 (sjette plass), var Brann tilbake i toppen i 2006. Klubben var serieleiar frå 9. til 21. serierunde, men kunne ikkje matche Rosenborg sin sluttspurt med ti sigrar og to uavgjorte på dei siste tolv kampane. Det vart dermed sølvmedaljar til Brann, for fjerde gong i klubben si historie. Sesongen vart skjemma av eit særs pinleg tap for det svenske amatørlaget Åtvidabergs FF i UEFA-cupen sin 2. kvalifiseringsrunde. Dobbeltoppgjeret endte 4-4 og svenskane avanserte på bortemål.

[endre] 2007 - seriegull

I 2007 starta Brann sterkt, og låg på 2. plass då første halvdel av serien var ferdigspilt. 22. oktober 2007, då den tredje siste serierunden var ferdigspelt, vart det klart at Brann tok seriegull for første gong sidan 1963. Brann tapte denne runden 2-1 mot Ålesund, men Stabæk, som måtte vinne alle sine tre siste kampar for å ta igjen Brann, tapte 2-1 mot Viking i Stavanger.

[endre] Tilhengjarar

Brann har lenge hatt mange tilhengjarar. I mange år var Brann Supporter Team den offisielle supporterklubben. Men BST gjekk konkurs i 2003 etter at det vart avdekka dårleg økonomistyring. Den offisielle supportarklubben i dag er Brann Bataljonen, som vart danna same år. I forhold til talet tilhengjarar har derimot Bataljonen få medlemmar og det har ikkje vore ein sterk kultur for organiserte supportarar i Bergen. Dette har gjeve seg utslag i fleire alternative supportergrupper. Av dei finn ein Apostlenes Røde Gærninger — ein kristen supporterklubb — som har eksistert sidan 1994.

[endre] Rivalisering

Brann har mange rivalar i Noreg. Geografisk er det ingen andre fotballklubbar i Bergen som spelar på same nivå. Men då dei var i Tippeligaen var Fyllingen ein av Brann sine største rivalar. Enkelte vil sei at Viking er ein av dei største rivalane, på grunn av den nære plasseringa til dei to byane Bergen og Stavanger. Det er ein urgamal debatt om kva for ein dei to som er Vestlandet si perle. Mange som held med Brann vil sei at erkerivalen er Rosenborg. Dette kjem igjen av rivalisering mellom byane Bergen og Trondheim. Rivaliseringa kjem óg av at Brann slo Rosenborg i cupfinalen 1972, medan RBK slo Brann i 1988, 1995 og 1999. Brann har óg spelt nokre kampar mot RBK som har hatt interessante resultat. Vålerenga og Lillestrøm SK står heller ikkje høgt i kurs hos Brann sin supporterskare, og Vålerenga er i mange auge den største rivalen.

[endre] Flest mål scora for Brann

1. Rolf Birger Pedersen 245 mål i perioden 1957-72.
2. Roald «Kniksen» Jensen 170 mål i perioden 1960-65/1971-73.
3. Bjørn Tronstad 127 mål i perioden 1974-79.
4. Gunnar Skagen 120 mål i perioden 1949-56.
5. Steinar Aase 93 mål i perioden 1973-79/1984-85.
6. Thorstein Helstad 91 mål i perioden 1998-02/2006-07.
7. Mons Ivar Mjelde 87 mål i perioden 1989-90/1996-2002.

[endre] Flest kampar for Brann

1. Tore Nordtvedt 557 kampar i perioden 1963-79.
2. Rolf Birger Pedersen 331 kampar i perioden 1957-71.
3. Geirmund Brendesæter 327 kampar i perioden 1990-2003.
4. Helge Karlsen 323 kampar i perioden 1967-79
5. Roy Wassberg 319 kampar i perioden 1989-93/1998-2004.

[endre] Brannspelarar med flest landskampar

1. Alexander Olsen 37 kampar, 1 mål.
2. Helge Karlsen 35 kampar, 0 mål
3. Finn Berstad 32 kampar, 13 mål
4. Roald «Kniksen» Jensen 27 kampar, 5 mål.

[endre] Vinnarar av Kniksen-prisen

• 1990: Per Egil Ahlsen Midtbane
• 1993: Tore Pedersen Forsvar
• 1996: Mons Ivar Mjelde Angrep
• 2000: Thorstein Helstad Angrep
• 2006: Håkon Opdal Målvakt

Kniksen-prisen er kalla opp etter Brann-legenden Roald «Kniksen» Jensen.

[endre] Årets Brannspelar

• 2000: Roy Wassberg
• 2001: Raymond Kvisvik
• 2002: Tommy Knarvik
• 2003: Raymond Kvisvik
• 2004: Ragnvald Soma
• 2005: Paul Scharner
• 2006: Håkon Opdal

[endre] Merittar

• Seriemeistarar: 1961-62, 1963 og 2007.
• Cupmeistarar: 1923, 1925, 1972, 1976, 1982 og 2004.
• Cupvinnarcupen: Kvartfinale 1996–97. Slo mellom anna PSV Eindhoven.
• UEFA-cupen: Tok seg vidare til gruppespelet i 2007-08 etter å ha spelt 2-2 samanlagt mot Club Brugge etter siger 2-1 i Belgia.

[endre] Nokre spelarar gjennom tidene

Eirik Bakke Atle Hellesø Thorstein Helstad Tore André Flo Roald «Kniksen» Jensen Finn Berstad Rolf Birger «Pesen» Pedersen Erik Solér Per Egil Ahlsen Claus Lundekvam Mons Ivar Mjelde

Geirmund Brændesæter Tore Nordtvedt Roger Helland Bjørn Tronstad Azar Karadaş Anders Giske Trond Egil Soltvedt Per-Ove Ludvigsen Trevor Morley Neil McLeod Raymond Kvisvik

Robbie Winters Charlie Miller Bjarni Sigurdsson Paul Scharner Seyi Olofinjana Joachim Björklund Svante Samuelsson Geir Hasund Martin Andresen

[endre] Hovudtrenarar siden 1960

Oddvar Hansen - (1960-1963) Pepi Stroh - (1964) Oddvar Hansen- (1965-1968) Karel Bucko- (1969-1972) Ray Freeman - (1972-1973) Bill Elliott - (1974-1978) Ivar Hoff - (1979)

Egil Austbø - (1979) Les Shannon - (1980-1981) Arve Mokkelbost - (1982-1983) Endre Blindheim - (1984-1985) Tony Knapp - (1986-1987) Per Vold - (1987) Teitur Þòrðarson - (1988-1990)

Karl Gunnar Björklund - (1991-1992) Hallvar Thoresen - (1993-1995) Kjell Tennfjord - (1995-1998) Harald Aabrekk - (1998-1999) Teitur Þórðarson - (2000-2002) Mons Ivar Mjelde - (2003- )

[endre] Leiing/trenarteam/støtteapparat

(Sist oppdatert 7. august 2007)

Namn	Stilling
Magne Revheim	Styreformann
Bjørn Dahl	Dagleg leiar
Roald Bruun-Hansen	Sportsleg leiar
Mons Ivar Mjelde	Hovudtrenar
Espen Steffensen	Assistenttrenar
Robert Hauge	Assistenttrenar
Patrik Hansson	Ressurstrenar
Dan Riisnes	Keepertrenar
Kjetil Knutsen	Toppspelarutviklar
Ola Jøsendal	Lege
Endre Digranes	Fysioterapeut
Raymond Sanden	Materialforvaltar
Bjørn Rune Skråmestø	Massør
Jan Erik Endresen	Manuellterapeut

[endre] Rekordar

• Største siger i Europacupen 8-0 mot Carmarthan (borte) 19. juli 2007
• Største heimesiger: 11-0 mot Vard Haugesund, 25. juni 1997
• Største bortesiger: 14-0 mot Aalesund, 26. august 1917
• Største heimetap: 0-7 mot FC Lyn Oslo, 8. august 1964
• Største bortetap: 0-10 mot Rosenborg BK, 5. mai 1996
• Tilskodarrekord, Brann Stadion: 24 800 mot Fredrikstad FK, 1. oktober 1961
• Høgaste tilskodarsnitt: 16 696 i 2006-sesongen 2006
• Flest kampar, totalt: 557, Tore Nordtvedt 1963-1979
• Flest kampar i Tippeligaen: 263, Tore Nordtvedt
• Mest merriterte spelar: Tore Nordtvedt, 2 seriemeisterskap og 2 cupmeisterskap.
• Flest mål totalt: 245, Rolf Birger Pedersen 1957-1972
• Flest mål i Tippeligaen: 132, Rolf Birger «Pesen» Pedersen 1957-1971

[endre] Bakgrunnsstoff

• Brann – SK Brann si heimeside
• Brann Bataljonen Bergen

[endre] Litteratur om Brann

• Larsen, Jan-Erik: Fra mål til ytterste fortvilelse, Bergen 1988
• Kalvik, Kjell Vidar: Hele Bergens stolthet, Bergen 2005
• Natlandsmyr, Gorm: Branns offisielle årbok (utgjeve kvart år sidan 2001)
• Larsen, Jan-Erik: Et århundre i bilder (lagbielte frå Sportsklubben Brann frå 1909 til våre dagar)
• Soltvedt, Thor: Flammene på Stadion (dikt om Brann)

Brann – spelarstallen 2008

Målmenn
12 Håkon Opdal
24 Nils Kenneth Udjus

Forsvarsspelarar
3 Bjørn Dahl
4 Cato Guntveit
6 Azar Karadas
15 Erlend Hanstveit
18 Ólafur Örn Bjarnason
21 Kristján Örn Sigurðsson
23 Michael Thwaite
25 Yaw Ihle Amankwah
28 Ármann Björnsson

Midtbanespelarar
2 Tijan Jaiteh
8 Gylfi Einarsson
9 Jan Gunnar Solli
11 Petter Vaagan Moen
13 Erik Huseklepp
17 Eirik Bakke
19 Nicolai Misje
30 Hassan El Fakiri

Angrepsspelarar
10 Njogu Demba-Nyrén
20 Trond Fredrik Ludvigsen
22 Thorstein Helstad
27 Matias Møvik
77 Robbie Winters