Robin Williams

Frå Wikipedia – det frie oppslagsverket

Robin Williams underheld marinetroppar frå Sambandsstatane

Robin McLaurin Williams (f. 21. juli 1951) er ein amerikansk filmskodespelar og komikar. Han vart fødd i Chicago i Illinois, og voks opp i Bloomfield Hills i Michigan og i Marin County i California. Far hans, Robert Fitzgerald Williams, var av skotsk, walisisk og irsk opphav, og var leiar for Ford Motor Company i Midtaust-USA. Mora til Williams var fødd i New Orleans, og var fotomodell.

Williams fekk merksemd då han gjorde eit stand-up-show i San Francisco. Etter å ha fullført studiane ved Claremont McKenna College, og ved Juilliard Drama School, fekk han ei rolle av Gerry Marshall i fjernsynsserien Happy Days som romvesenet «Mork». «Mork» vart så populær blant sjåarane at det førde til ein eigen fjernsynsserie, Mork and Mindy, som gjekk i USA frå 1978 til 1982.

Størsteparten av skodespelarkarrieren til Williams har vore innan kinofilmar, men han har òg hatt nokre nemneverdige opptredenar på teaterscena òg. Dei fyrste hovudrollene hans var i filmane Popeye (Skipper'n) i 1980, og The World According to Garp (Garp og hans verden) i 1982. Begge desse filmane hadde eit lågt billettsal, men filmen Good Morning, Vietnam frå 1987 vart nominert til Oscar, og gjorde at Williams vart verdskjend som skodespelar. Williams er òg kjend som ein flink stemmeskodespelar, og har gjeve stemme til fleire animerte filmar, som filmen Aladdin frå 1992 og Robots (Robotene) frå 2005.

I 1997 vant Williams Oscar for beste birolle, etter opptredenen hans som psykolog i Good Will Hunting (Den enestående Will Hunting).

Williams er òg godt kjend for sine ville improteater-eigenskapar og parodiar. Han er ein talentfull imitator, og kan gå ut og inn av roller svært fort. Williams har sagt at han byrja med parodier og imitasjoner som barn, då han etterlikna sørstatsdialekta til tanta si. Han har òg delteke som gjest på improvisasjonsprogrammet Whose Line Is It Anyway?.

Det fyrste ekteskapet til Williams var med Valerie Velardi og byrja 4. juni 1978. Dei to fekk eit barn saman, Zachary. Dette ekteskapet enda i 1988, og i 1989 gifta han seg for andre gong, med Marsha Garces. Dei fekk to born saman.

Williams og kona hans grunnla Windfall Foundation, ein filantropisk organisasjon som samlar inn pengar til fleire veldedige saker. Williams viar mykje energi til veldedigheitsarbeid, blant annet for Comic Relief. Han er òg ein sykkelfan, og skal visstnok eige hundrevis av syklar og delta i Tour de France. Gjennom si interesse for sykling er han ein god ven og tilhengjar av Lance Armstrong og stiftinga hans, og opptrer ofte for den.