Margarita
Frå Wikipedia – det frie oppslagsverket
Ein margarita er ein alkoholhaldig drink, ein cocktail, med tequila som den viktigaste ingrediensen.
For å laga ein margarita blandar ein tre delar tequila, to delar likør med appelsinsmak (som Cointreau eller Curaçao), og ein del lime-jus. Drinken vert servert med saltrand på kanten av glaset. Av og til får ein og drinken med ei skive lime på kanten.
[endre] Eit mytisk opphav
Det finnst fleire historier om kor tequilaen først vart laga, og av kven. Her følger nokre av dei mest kjende[1]:
- Tidleg på trettitallet vart cocktailen skap på veddeløpsbanen Caliente i Tijuana
- I 1936 skapte Danny Negrete drinken for kjærasten sin, Margarita, då han arbeidde på Garci Crespo Hotel i Tijuana.
- Carlos Herrera skapte denne drinken i 1938 eller 1939 for Marjorie King, ei "showgirl" som ikkje kunne drikke andre typar brennevin enn tequila. Dette skjedde på baren Rancho La Gloria i Tijuana.
- 4. juli 1942 spurte ein kunde Francisco Morales, bartender på Tommy's Place i Ciudad Juárez, etter ein magnolia, men han huska ikkje innhaldet i han. Dermed fant han på noko, og kalte drinken "Prestekrage", på spansk "Margarita".
- Ein gong på førtitallet skapte Enrique Bastante Gutierrez denne drinken for filmstjerna Rita Hayworth, som eigentleg heitte Margarita Carmen Cansito.
- I 1948 skapte Margaret Sames drinken for eit selskap ho heldt i baren sin i Acapulco. Seinare flytte ho til El Paso, Texas, og opptrådte på fjernsyn i USA for å vise korleis den ekte margaritaen skulle vere.
- I 1948 vart drinken til i The Balinese Room i Galveston, Texas, av bartenderen Santo Cruz. Han laga drinken til songarinna Peggy Lee.
- Tidleg på femtitalet vart drinken laga på restauranten "Tail o' the Cock" i Los Angeles for å introdusere tequilamerket José Cuervo.
Sjølv om opphavet til drinken er uklar, krinsar historiene om grensa mellom USA og Mexico. I USA har det oppstått heilt nye tolkingar av drinken, til dømes Frozen Margarita, med mengder av is. Strawberry Margarita lagast med jordbær, og Vodka Margarita lagast med vodka i staden for tequila.
