Düren

Frå Wikipedia – det frie oppslagsverket

**Düren**
Styresmakter
Rådhuset i Düren
Byvåpen	Plassering
	Düren
Land Delstat Regierungsbezirk‎ Landkreis	Tyskland Nordrhein-Westfalen Köln Düren
Geografi
Flatevidd - By	85,02 km²
Innbyggjarar - By (2007) - folketettleik	92 614 1 089/km²
Koordinatar	50°48′0″N 06°29′0″EKoordinatar: 50°48′0″N 06°29′0″E
Høgd over havet	125 m
Tidssone - Ved sommartid	CET (UTC+1) CEST (UTC+2)
Diverse annan informasjon
Postnummer	52349/52351/52353/52355
Telefon-retningsnummer	02421
Bilnummer	DN
Heimeside: www.dueren.de

Düren er ein by i Tyskland i delstaten Nordrhein-Westfalen med om lag 100 000 innbyggjarar. Byen ligg i landkreisen med same namn mellom Aachen og Köln ved elva Rur.

[endre] Historie

Keltarar hadde ein liten busetnad her kalla Durum for meir enn 2000 år sidan. Etter keltarane busette andre germanske stammer seg i området, og dei vart erobra av romarane under Julius Cæsar.

Durum vart eit forsyningsområde for den raskt veksande romerske byen Köln. I tillegg låg Durum ved fleire viktige romerske vegar. Romarane var i området i om lag 400 år. Namnet Villa Duria dukka for første gong opp i frankiske årbøker i år 747.

Etter romarane forlot staden på 400-talet kom frankarar til Düren. Den frankiske kongen Pippin den yngre vitja ofte Düren på 700-talet og haldt eit par viktige konferansar her. Pippin var far til den kjende Karl den store. Frankarane bygde eit kongeleg palass i Durum, som namnet Pfalz kjem frå. Karl den store opphaldt seg òg eit par gongar i byen. Slottet vart bygd der kyrkja St. Anne står i dag.

Tidleg på 1200-talet fekk Düren byrettar. Rundt 1200 byrja byggjinga av bymurar med tolv tårn og fem portar. Det finns framleis ruinar av byportane i dag.

Tjuven Leonhard stjal ein liten boks med levningane av St. Anne frå Mainzer Stiftskirche St. Stephan i 1501 og førte dei til Düren. Pave Julius II avgjorde 18. mars 1506 at Düren kunne få ha levningane. Dei vart halde i Martinskirche, som fekk namnet Annakirche i 1505. St. Anne vart skytshelgenen til Düren. Kvart år frå den 26. juli vert St. Anne feira i ei veke med ein av dei største folkefestane i Tyskland.

I 1642 vart Düren trekt inn i trettiårskrigen, og troppar på begge sider øydela byen. Etter krigen tok slutt i 1648 braut det ut pest i byen som tok mange liv. Ein annan epidemi råka byen i 1665.

Økonomien i området rundt Düren vart frå 1400-talet styrt av kleshandel og metallindustri. Sidan byrjinga av 1600-talet har det vore papirindustri her, som har nytta det svært blaute vatnet i Rur. Rütger von Scheven bygde den første papirfabrikken i Düren. I 1812 var det alt 17 papirfabrikkar, 11 kles- og teppefabrikkar, ein platikator og to jernstøyperi.

I 1794 vart Düren okkupert av franske revolusjonsstyrkar. Etter Wienerkongressen vart Düren avstått til Preussen i 1815.

I 1900 var Düren ein av dei rikaste byane i Tyskland med 42 millionærar og 93 fabrikkar og eit folketal på 27 168. Mindre enn hundre år tidlegare budde berre 5 000 menneske i Düren.

Under den andre verdskrigen vart slaget om Hürtgenwald utkjempa i området rundt Düren, og 16. november 1944 vart byen totalt øydelagd under eit alliert bombetokt. Om lag 3 000 innbyggjarar mista livet. Dei som overlevde vart evakuert til sentrale delar av Tyskland.