Wolfgang Overath
Vun Wikipedia
Wolfgang Overath (* 29. September 1943 in Siegburg) is en ehmalger düütsch Footballspeler un siet Juni 2004 Präsident vun 1. FC Köln.
He is anfungen mit Football bi de Vereen Siegburger SV 04. 1962 is he to’n 1. FC Köln wesselt. As de Bundsliga 1963 anfangen de, weer he en vun de jüngste Spelers, de meld weern. Bit 1977 hett he för de Kölner 765 Spelen makt mit 287 Dooren, dorvan in de Bundsliga 409 mit 83 Dooren. Mit sien Vereen is he düütsch Meester in dat Johr 1964 und DFB-Pokalwinner in dat Johr 1968.
Tüschen 1963 un 1974 hett he 81 Mal in de düütsche Natschonalmannschap speelt un 17 Dooren schaaten. Bi de Weltmeesterschap 1966 in England wurr de Middelfeldspeler Viezweltmeester, 1970 in Mexiko hebbt se Platz 3 belegt un to’n gooden Letzt 1974 is he in Düütschland ok Football-Weltmeester wurrn.
Nah sien Karriere hett he eerst as Repräsentant bi en Sportartikelfirma arbeid, weer ok mal Lidmaat vun Verwaltungsraat vun sien Vereen. Nahdem he sück lang wehrt harr un kien Vereensposten annemmen wull, hett he sück 2004 doch breetslahn laten un is Präsident vun de 1. FC Köln wurrn.
He is ok Ehrenbörger vun Siegburg. He is verheiraat un hett 2 Söhns un een brasilianisch Adoptivdochter.
