Thalia (Mythologie)
Vun Wikipedia
Thalia (ok Thaleia, vun greek. θάλλεω „bleihen“: De, de bleiht; De, de vergnöögt is) is een vun de negen Musen ut de Greeksche Mythologie. Dorto höört se noch to de Chariten mit to. Bi us warrt to de Chariten meist Grazien seggt.
Thalia weer toeerst de Muse vun de Kummedi in Theater un Dichterskunst. Later weer dat as ehr Upgaav ankeken, dat se all Theaters schützen dö. Up Biller is se jummers mit en Schabellenkopp to sehn oder mit en Kranz vun Efeu oder mit den Schäper sien Krummstaff. Se warrt as Froo vun’t Land ankeken. Ehr Öllern sünd Zeus un Mnemosyne. Se hett sik mit den Gott Apollon inlaten un hett denn de Korybanten as Kinner kregen. Dat weern de Göddin Kybele ehr Preesters.
