Seefohrt
Vun Wikipedia
De Seefohrt is de Verkehr op de See mit Scheep un Boote.
Na den Sinn ünnerscheed wi
- Hannelsfohrt
- Kriegsfohrt
- Fischeree
- Forschungsfohrt
- Seeröveree
För dat de Seefohrers ook na den Hoben finnen doot, gifft dat de Navigation. Freuger weer de Seefohrt de enigste Meuglichkeet, vun een Kontinent na een annern un ook vun een Insel na dat faste Lann un ümkehrt to komen. Hüüt geiht dat twors ok mit den Fleger, aver de Welthannel baseert jümmers noch op de Seefohrt. Dat hett ok sien Grund, vun wegen dat de Seefohrt de Saken nich blots billiger transporteert. Ok för de Umwelt is dat veel beter, vun wegen dat dor nich so veel Larm un Kohlenstoffdioxid bi rutkümmt.
De Seefohrt is de öllste Oort vun Verkehr - afsehn vun dat to Foot loopen. Al in de Steentied harrn de Lü anfungen, Boote to baun un dormit op de See to fohrn. Op ole Steenteken in Skandinavien is dat al antokieken. Toers güng dat blots na lütte Inseln vör de Küst, later denn ook wieder. De Ägypters harrn sick denn op den Nil de ersten grötteren Scheep infallen laaten, denn ok de Karthagers un de Greeken.