Highlands
Vun Wikipedia
De Highlands (ok Schottsch Hoochland oder Hoochland vun Schottland nöömt; Schottsch Gäälsch: A’Ghaidhealtachd) sünd de Bargens in’n Norden vun Schottland. Dat Rebeet süüdlich dorvun warrt as de Lowlands betekent.
De Highlands warrt dör en tektonschen Graven, den Great Glen (Glen is dat schottsch Woort för Daal), ünnerdeelt in de Northwest Highlands un de Grampian Mountains. Längsden Great Glen gifft en Keed vun Seen, dorünner ok de Loch Ness as de bekannste See in Schottland överhööft. De hööchste Barg vun de britschen Eilannen is de Ben Nevis mit 1344 m Hööch. De liggt in de Grampian Mountains in de Neeg vun Fort William. Man, de Highlands sünd nich blots bekannt för de tyypsch Barglandschap. Överall in’t Rebeet gifft dat Lochs (Seen) mit jemehr düchtig klor Water un de Westen vun de Higlands sett sik ut en groten Teppich vun lütte un grote Eilannen, Halfeilannen un vertwiegte Waterweeg tosamen, wat de Landschap prägen un eenzigordig maken deit.
De Highlands weern in de Historie weniger den engelschen Influss utsett as de Lowlands un hebbt sik dorüm beter jemehr kulturellen Egenheiten bewahrt. Sünners de schottschen Clan-Strukturen sünd in de Highlands noch lebennig. To’n Deel warrt disse Tarditschoon aver ok vun wegen den Tourismus bewahrt, de in de Highlands düchtig utprägt is. De traditschonelle Kultur, de historsichen Vörgäng un nich toletzt ok de Produkschoon vun Whisky hebbt de Highlands in de ganzen Welt beropen maakt. Vun de Touristen warrt de Highlands vör allen ok vun wegen de wunnerschöne Landschap geern besocht, de veel ok vun Wanneres nütt warrt.
De Schriever John C. MyIntyr hett in en Gedicht een vun de bösesten Vörgäng vun de Highlands beschreven, dat vun 1782 bit 1820 un twüschen 1840 un 1854 passeert is. Dat Begeevnis is vundaag ünner de Beteken Highland Clearances bekannt.
[ännern] kiek ok
- Highland (Unitary Authority)
- Highlands and Islands
[ännern] Weblenken
- Informatschonen för’t Reisen (hoochdüütch)
