Dackspraak
Vun Wikipedia
Ene Dackspraak is ene Spraak oder ene Spraakebene, de in gröttere Rebeden as eenheitliche Spraak över de Dialekten staht.
De Dialekten sünd faken blots op lütte Rebeden begrenzt. Lüüd vun wieder weg snackt Dialekten, de jümmer gröttere Ünnerscheden hebbt. Wenn Lüüd, de sik op Basis vun jemehr Dialekten blots swoor verstännigen köönt (de Ünnerscheden billt ene Spraakbarrier), mitenanner snacken wüllt, denn bruukt se mehrsttiets ene gemeensame Dackspraak, wenn de vörhannen is. Över dat Plattdüütsche staht dat Hoochdüütsche as Dackspraak, dat mehrsttiets in Wetenschop un Medien bruukt warrt. As mündliche Nahspraak (in Familie, ünner Frünnen un Bekannten) warrt faken noch Plattdüütsch bruukt, denn bi dat Snacken vun Person to Person is mehrsttiets kene Spraakbarrier vörhannen un dat Bruken vun de Dackspraak nich nödig.
