മച്ചിലിപട്ടണം
വിക്കിപീഡിയ, ഒരു സ്വതന്ത്ര വിജ്ഞാനകോശം.
ആന്ധ്രാപ്രദേശിലെ കൃഷ്ണ ജില്ലയില് സ്ഥിതി ചെയ്യുന്ന ഒരു തീരദേശപട്ടണമാണ് മച്ചിലിപട്ടണം അഥവാ മസൂലിപട്ടണം. കൃഷ്ണ നദീതടത്തിലാണ് സ്ഥിതി ചെയ്യുന്ന ഈ പട്ടണം കൃഷ്ണ ജില്ലയുടെ ആസ്ഥാനമാണ്. പുരാതനകാലം മുതല്ക്കെ ഇവിടുത്തെ തുറമുഖം വിദേശവ്യാപാരത്തിന് പേരുകേട്ടതായിരുന്നു. കൃഷ്ണ നദി ബംഗാള് ഉള്ക്കടലുമായി ചേരുന്ന അഴിമുഖങ്ങളിലൊന്നിലാണ് ഈ തുറമുഖം സ്ഥിതി ചെയ്യുന്നത്. മത്സ്യബന്ധനം, പരവതാനി നിര്മ്മാണം, നെല്കൃഷി, എണ്ണക്കുരു തുടങ്ങിയവയാണ് ഇവിടത്തെ പ്രധാന തൊഴില്മേഖലകള്.
ഓങ്ങോളിനും മച്ചിലിപട്ടണത്തിനും ഇടയിലുള്ള ആന്ധ്രാതീരം ചക്രവാതഭീഷണി ഏറെയുള്ള മേഖലയാണ്. 1977-ലെ കൊടുങ്കാറ്റും, 2004-ല് ഉണ്ടായ സുനാമിയും മച്ചിലിപട്ടണത്തില് കാര്യമായ നാശനഷ്ടങ്ങള് വരുത്തിയിട്ടുണ്ട്.
[തിരുത്തുക] ചരിത്രം
ശതവാഹനരുടെ കാലം അതായത് ബി.സി.ഇ. മൂന്നാം നൂറ്റാണ്ടു മുതല്ക്കു തന്നെ ഈ പട്ടണം നിലനിന്നിരുന്നു. 17-ആം നൂറ്റാണ്ടില് ഗോല്ക്കൊണ്ടയുടെ ഭാഗമായിരുന്ന ഇത് ഒരു പ്രധാന വാണിജ്യകേന്ദ്രമായിരുന്നു[1].
ആന്ധ്രാതീരത്തെ ഏറ്റവും പ്രധാന തുറമുഖമായതിനാല് ഡച്ച് ഈസ്റ്റ് ഇന്ത്യാ കമ്പനിയും ഇംഗ്ലീഷ് ഈസ്റ്റ് ഇന്ത്യാ കമ്പനിയും പട്ടണത്തിന്റെ നിയന്ത്രണം കൈയടക്കാനായി ശ്രമിച്ചു കൊണ്ടേയിരുന്നു. ഇവിടത്തെ കോട്ട പണീതത് ഡച്ചുകാരായിരുന്നു.
ഗോല്ക്കൊണ്ടയിലെ ഖുത്ബ് ശാഹി ഭരണാധികാരികള് തുണിത്തരങ്ങളുടേയും സുഗന്ധദ്രവ്യങ്ങളുടേയും മറ്റും കച്ചവടകുത്തക കൈയടക്കിയിരുന്നു. കച്ചവടത്തിന്റെ നിയന്ത്രണം ഈസ്റ്റ് ഇന്ത്യാ കമ്പനികളുടെ നിയന്ത്രണത്തിലാകാതിരിക്കാനായിരുന്നു. ഇത്.
ഗോല്ക്കൊണ്ട പ്രഭുക്കള്, പേര്ഷ്യന് കച്ചവടക്കാര്, തെലുഗ് കോമാട്ടി ചെട്ടിമാര്, യുറോപ്യന് കച്ചവടക്കാര് എന്നിങ്ങനെ വിവിധ കച്ചവടവിഭാഗങ്ങളുടെ പരസ്പരകിടമല്സരം ഈ നഗരത്തെ പ്രശസ്തവും സമ്പന്നവുമാക്കി.
മുഗളര് അവരുടെ അധികാരം ഗോല്ക്കൊണ്ടയിലേക്ക് വ്യാപിപ്പിക്കാന് തുടങ്ങിയപ്പോള്, മിര് ജൂംല എന്ന കച്ചവടക്കാരനായിരുന്നു മച്ച്ലിപട്ടണത്തിലെ മുഗളരുടെ പ്രതിനിധി. അദ്ദേഹം ഇംഗ്ലീഷ് ഡച്ച് ഈസ്റ്റ് ഇന്ത്യാ കമ്പനികളെ തമ്മിലടിപ്പിക്കാന് തുടങ്ങി.
1686-87 കാലഘട്ടത്തില് മുഗള് ചക്രവര്ത്തി ഔറംഗസേബ് ഗോല്ക്കൊണ്ട കീഴടക്കി മുഗള് സാമ്രാജ്യത്തിന്റെ ഭാഗമാക്കി. ഇതോടെ വ്യാപാരത്തിനായി മറ്റു മാര്ഗങ്ങള് തേടാന് യുറോപ്യന് കമ്പനികള് നിര്ബന്ധിതരായി. അങ്ങനെ ഈസ്റ്റ് ഇന്ത്യാ കമ്പനി കച്ചവടക്കാര് ബോംബെ, കൊല്ക്കത്ത, മദ്രാസ് എന്നിവിടങ്ങളിലേക്ക് ചേക്കേറാന് തുടങ്ങി. ഇതോടെ മച്ച്ലി പട്ടണം അതിന്റെ കച്ചവടക്കാരേയും സമ്പന്നതയും നഷ്ടപ്പെട്ട് പതിനെട്ടാം നൂറ്റാണ്ടോടെ ഒരു സാധാരണ പട്ടണമായി പരിണമിച്ചു.
[തിരുത്തുക] സംസ്കാരം
പ്രകൃതിദത്തമായ ചായങ്ങള് ഉപയോഗിച്ചുള്ള കലംകാരി തുണിത്തരങ്ങള്ക്കും ചിത്രങ്ങള്ക്കും മച്ച്ലിപട്ടണം പ്രസിദ്ധമാണ്. കലം അഥവാ പേന ഉപയോഗിച്ചുള്ള ചിത്രകലാരീതിയായതിനാലാണ് കലംകാരി എന്ന പേര് ഇതിന് വന്നത്. പതിനേഴാം നൂറ്റാണ്ടില് പടിഞ്ഞാറന് കച്ചവടക്കാരെ ഇവിടേക്ക് ആകര്ഷിക്കുന്നതില് കലംകാരി ചിത്രകല ഒരു പ്രധാന പങ്കുവഹിച്ചു.
[തിരുത്തുക] ആധാരസൂചിക
- ↑ Social Science, Our Pasts-II, NCERT Text Book in History for Class VII, Chapter 6, Towns Traders and Craftspersons, Page 85-86, ISBN 817450724