തിങ്കളാഴ്ചവ്രതം
വിക്കിപീഡിയ, ഒരു സ്വതന്ത്ര വിജ്ഞാനകോശം.
സ്ത്രീകള് മാത്രം അനുഷ്ടിക്കുന്ന വ്രതമാണ് തിങ്കളാഴ്ചവ്രതം. പെണ്കുട്ടി ഋതുമതിയാകുന്ന സമയം മുതല് ആചരിക്കുന്ന ഈ വ്രതം വൈധവ്യ കാലത്തെ നിര്ത്തൂ. ഭര്ത്താവിന്റെ ആയുസ്സിനും യശസ്സിനും സുഖദാമ്പത്യത്തിനും വേണ്ടിയാണ് ഈ വ്രതം ആചരിക്കുന്നതെന്നാണ് വിശ്വാസം. സര്വ്വശക്തനായ പരമേശ്വരന്റെ പ്രീതി ലഭിക്കാനായി എല്ലാ മംഗല്യസ്ത്രീകളും ആചരിക്കാറുണ്ട്.
[തിരുത്തുക] ഐതിഹ്യം
സീമന്തിനി എന്ന രാജകുമാരിയാണ് തിങ്കളാഴ്ച വ്രതാചരണം ആരംഭിച്ചത്. ജാതകപ്രകാരം വൈധവ്യം സംഭവിക്കുമെന്ന് അറിഞ്ഞ സീമന്തിനി വളരെ ദു:ഖിതയായി. ഋഷിവര്യനായ യാജ്ഞവല്ക്യന് മുനിയുടെ പത്നി മൈത്രേയിയെ കണ്ട് സങ്കടം ഉണര്ത്തിച്ചു. അവരുടെ നിര്ദേശപ്രകാരം സീമന്തിനി തിങ്കളാഴ്ച വ്രതം ആരംഭിച്ചു. രാജകുമാരിയുടെ വിവാഹശേഷം തോണിയാത്രയ്ക്ക് പോയ രാജകുമാരന് മുങ്ങിപ്പോയി. അകാലവൈധവ്യം പേറിയ സീമന്തിനി ശിവഭജനം തുടങ്ങി. ജലത്തില് താഴ്ന്ന കുമാരനെ നാഗകിങ്കരന്മാര് കെട്ടി വലിച്ച് നാഗസഭയില് എത്തിച്ചു. തേജസ്സ് നിറഞ്ഞ രാജകുമാരനെ കണ്ട നാഗരാജാവ് കുമാരനോട് തന്റെ പരദേവത ആരാണ് എന്നു ചോദിച്ചു. തെല്ലും സംശയം കൂടാതെ ’സര്വ്വശക്തനായ തിങ്കള് ചൂടന് നമസ്ക്കാരം’ എന്നു പറഞ്ഞു. കുമാരന്റെ ശിവഭക്തിയില് സന്തോഷമായ നാഗരാജാവ് രാജകുമാരനെ ഭൂമിയില് എത്തിച്ചു. അങ്ങനെ സീമന്തിനിക്ക് ഭര്ത്താവിനെ തിരിച്ച് കിട്ടി.
[തിരുത്തുക] അനുഷ്ടിക്കേണ്ട വിധം
തിങ്കളാഴ്ചകള് മുടങ്ങാതെ ശിവക്ഷേത്ര ദര്ശനവും പരമശിവന് കൂവളത്തിലയും, ശ്രീപാര്വ്വതി ദേവിയ്ക്ക് വെളുത്ത പുഷ്പങ്ങളും നല്കുക എന്നിവ ഭര്ത്താവിന്റെ ഐശ്വര്യത്തിനും സന്താനഭാഗ്യത്തിനും മംഗലഭാഗ്യത്തിനും ഉത്തമമായി കരുതുന്നു. സാധാരണ തിങ്കളാഴ്ച ഒരിക്കലായിട്ടാണ് വ്രതം ആചരിക്കാറുള്ളതു. ഒരിക്കല് എന്നു വച്ചാല് ,ദിവസം ഒരു പ്രാവശ്യം മാത്രമേ അരി ആഹാരം കഴിക്കൂ. മറ്റ് നേരങ്ങളില് അരിയാഹാരം പാടില്ല . ചിലര് ശിവക്ഷേത്രത്തിലെ നേദ്യചോറാണ് കഴിക്കാറ്.
[തിരുത്തുക] ശിവഭജനം
തിങ്കളാഴ്ചദിവസം ശിവഭജനം സുഖദാമ്പത്യത്തിന് അത്യുത്തമമാണു. ശിവന്റെ മന്ത്രങ്ങള് ഉരുവിട്ട് ശിവക്ഷേത്രം വലം വയ്ക്കുന്നതും വിളക്ക് കൊളുത്തി ശിവഭജനം നടത്തുന്നതും പൂജ നടത്തുന്നതിനു തുല്യഫലം നല്കുന്നതാണു. ശിവപാര്വ്വതി മന്ത്രങ്ങള് ചേര്ത്ത് വേണം ശിവനെ ഭജിക്കാന്. എന്തെന്നാല് പരമശിവന്റെ പകുതി ശരീരം ശ്രീപാര്വ്വതി ദേവിക്കയി കരുതപ്പെടുന്നു.
'നമ:ശിവായ ശിവായ നമ:' എന്ന മൂലമന്ത്രത്തെ നൂറ്റിയെട്ട് പ്രാവശ്യം ജപിക്കുന്നത് ഐശ്വര്യദായകമായി കരുതപ്പെടുന്നു. ശിവപുരാണവും ദേവിമാഹാത്മ്യവും അന്നേ ദിവസം ജപിക്കുന്നത് ഉചിതമാണു.