Јеховини сведоци
Од Википедија, слободна енциклопедија
Јеховини сведоци се меѓународна религиозна организација која го отфрла модерното христијанство во полза на она кое се проповедало во текот на првиот век. Тие се водат според сфаќањето на пишаните закони и принципи врз основа на упатства примани од Владеачкото тело на Јеховините сведоци. „Watch Tower Bible and Tract Society of New York“ е легална организација на Јеховините сведоци што ја користат за религиозна работа.
Религијата се развила како одговор на она што го виделе како компромис и корупција во општото христијанство. Не ги признаваат Светото тројство, пеколниот оган, бесмртноста на душата и свештенството како важечки додатоци на изворното христијанско учење. Името „Јеховини сведоци“ е земено од Исаија 43:10 во 1931 година. Горенаведената организација издава религиозни материјали од крајот на 19 век; најпознати се списанијата „Стражарска кула“ и „Разбуди се!“.
Во 2007 имале околу 17,5 милиони луѓе што редовно или повремено ги посетуваат нивните собири. Сепак, како членови ги вбројуваат само оние што се јавуваат на проповедите секој месец. Во август 2007 имале вкупно членство од околу 7 милиони.
Главната тема на нивното учење е славењето на светото име Господово и докажувањето на Неговиот суверенитет, преку Неговото царство, со Исус Христос како негов владетел. Сведоците веруваат дека владеењето на Исус започнало со Второто доаѓање или присуство на Спасителот, што било означено како пророштво на крајот на „Неверничките времиња“. Отпрво, верувале дека ова се случило невидливо во 1874, но подоцна датумот е преместен на 1914 година.
Други учења на Сведоците ја вклучуваат употребата на еврејското господово име, Јехова (или Јахова, Јахве) коешто се сретнува повеќе од 7 000 пати во изворните библиски писанија, обично преведено како „YHWH“ или Јахве и верувањето дека употребата на неговото име и познавањето на неговото име е важен дел од обожувањето. Веруваат дека смртта на Исус била неопходна за исправањето на гревот направен од првиот човек, Адам, отворајќи го патот на надешта за вечен живот на човечкиот род. Исто така дел од нивното учење е дека 144 000 луѓе ќе добијат вечен живот во рајот како совладетели со Исус Христос, кои ќе го водат остатокот од човештвото до совршеност на рајска земја за време на илјадагодишното владеење. Јеховините сведоци веруваат дека за време на Армагедонот, којшто треба да се случи во блиска иднина, грешните ќе бидат уништени, а преживеаните, покрај милионите што ќе бидат воскреснати, ќе оформат ново општество владеано од рајска влада, со Спасителот како крал. Така човештвото ќе има можност да живее вечно во земски рај - можност, бидејќи сѐ зависи од нивните дејствија по воскреснувањето.
