Kim Clijsters
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
Kim Clijsters (8 juni 1983) ies 'n veurmalige Belzje tennisster. Zie ies 'n veurmalig nummer 1 van de waereldranglies. Häör groatste succes ies 't winne van de US Open van 2005.
Clijsters woort gebore in Bilze en ies 'n dochter van de veurmalige vootballer Lei Clijsters. Zie debuteerde in 't proftennis in 1999 op 't toernooi van Antwerpe. 't Seizoen daoveur houw zie es juniore al de finale van Wimbledon gehaold en dubbeltitels gewónne op Roland Garros (mèt Jelena Dokic) en op de US Open (mèt Eva Dyrberg).
Op 20 september 1999 wón Clijsters häöre ièrsjte titel in 't WTA-circuit, namelik 't toernooi van Luxemburg. 'ne Maond later haolde zie same mèt Laurence Courtois de dubbeltitel in Bratislava.
In 2001 bereikde Clijsters veur 't ièrsj de finale van 'n Grand Slam-toernooi, namelik op Roland Garros in Paries. Clijsters verloor dees finale van Jennifer Capriati mèt 10-12 in de derde set . In 2002 wón zie 't Masterstoernooi in Los Angeles. In 't jaor 2003 wón Clijsters neuge toernooie, woa-ónder nog ins de WTA Masters. Clijsters bereikde de finale op Roland Garros en de US Open, meh verloor allebei de kière van Justine Henin-Hardenne. In diet jaor veurde ze ouch 'n paar weke de waereldranglies aan.
In 2004 verloor Clijsters de finale van de Australian Open, obbenuujts van Justine Henin-Hardenne. Vervolges wón zie twiè toernooie, meh raakde daonao geblesseerd aan häöre pols en koes tièn maond neet tennisse. Ouch privé waore d'r probleme: Clijsters verbrook häör relatie mèt toptennisser Lleyton Hewitt. In februari 2005 maakde Clijsters häöre comeback in Antwerpe. De comeback waor hièl succesvol: Clijsters wón 14 wedsjtrieje op rie en behaolde de titel in Indian Wells en Miami. Nao nog 3 toernooie gewonne te höbbe kaom Clijsters truuk in de top 10 van 't vrouwetennis. Häöre ièrsjte Grand Slam-titel behaolde Clijsters op de US Open van 2005; in de finale versjloog zie de Française Mary Pierce.
Tiejes de Australian Open van 2006 moos Clijsters opgeve in de hauf finale, meh ze kaom waal weer truuk op de ièrjste plaats van de WTA-ranglies. In mei wón Clijsters 't toernooi van Warschau. Op 't toernooi van Montréal blesseerde Clijsters ziech, woadoor ze häöre US Open-titel neet koes verdedige. Bie häöre rentree in Hasselt wón ze metein 't toernooi.
't Sezoen 2007 begoes Clijsters, sjuus wie 'n jaor ièrder, mèt wins op 't exhibitietoernooi van Hongkong. Ze wón ouch in Sydney, door in de finale te winne van Jelena Janković. In de finale van de Proximus Diamond Games in Antwerpe verloor Clijsters van Amélie Mauresmo. Häör lètste professioneel wedsjtried sjpeelde ze op 't toernooi van Warschau in de twiède runde tege Julia Vakulenko.
Op 6 mei 2007 maakde Clijsters op häör website bekènd per direk te sjtoppe mèt professioneel tennis, naodat zie al ièrder houw laote weite dat 2007 häör lètste jaor es tennisster zou zin. Op 14 juli 2007 zal ze trouwe mèt de Amerikaanse basketballer Brian Lynch.
[bewirk] Óndersjeijinge
Kim Clijsters haet versjeije óndersjeijinge gekrege; zoa ies zie versjillende kière "Sjportvrouw van 't Jaor" gewaes in Belsj (1999, 2000, 2001, 2002) en wón zie in 2001 same mèt Justine Henin-Hardenne de Nationale trofee veur sjportverdeenste. In 2003 woort ze oetgerope tot Belzje "Sjportperseunlikheid van 't Jaor" en kreeg ze 't Groatkruus in de Kroanorde van keuning Albert.
