Johannes de Duiper
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
Sint-Jan of Johannes de Duiper ies de zoon van de preester Zacharias en Elisabeth. Wie Maria op bezeuk ging, de Visitatie geneump, bie häör niesje Elisabeth waor die in verwachting van Johannes. Johannes woort in ziene tied es 'ne profeet gezeen: hae verkóndigde 't woord van God en verriechde symbolische handelinge zoa-es de duip es teike van bekièring. Johannes wees op de kóms van emes dae belangrieker zou zin es haezelf en dae in plaats van mèt water mèt de H. Geis en vuur zou duipe. Ouch Jezus leet ziech door häöm duipe in de rivier de Jordaan. Bie die gelegenheid woort aan Johannes de messiaanse zending van Jezus geopenbaard es 't woar Lam Gods. Jezus haet ziech toen nog 'ne tiedlank bie Johannes aangesjlote tot'r ziene eige weeg ging.
Ziene fièsdaag weurt, in tegesjtèlling tot de geweunte um de sjterfdaag van 'ne heilige te gedinke, gevierd op ziene geboortedaag 24 juni. Dat ies teves de daag van de miedzomerzónnewende, woa-op in versjillende dörper de Sint-Jansvure woorte óntsjtoke.
[bewirk] Folklore
Bie die Sint-Jansvure woort ouch gedruèg kroed verbrend. Dónderkroed, Maoter en Aels, drie bekènde plante van de kroedwösj, die geplök waore op deze biezónderen daag, zouwe zoa väöl extra krach höbbe, dat ze neet allein tege brand en krenkdes besjermde meh ouch hekse, duvele, waerwuif en sjpoake verdreve.
[bewirk] Veurname
Limburgse veurname, die sjtamme van Johannes zint: (jóngesname) Johan, Jo, Joës, Jan, Zjeng, Sjeng, Jean, Han, Hans.
Maedsjesname: Johanna, Jo, Han(na), Anna, An, Anne, Zjan, Jeanne.
'ne Ander Sint Jan ies Johannes (evangelis), mèt es fièsdaag 27 december.
