Hoei

Van Wikipedia

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.

Liegking van Huy in de provincie Luuk

Hoei (Frans: Huy, Waals: Hu) ies 'n sjtad en gemeinte in de Belzje provincie Luuk, in 't arrondissemennt Hoei. De gemeinte haet 'n oppervlakte van 47,74 km² en dao wone 20.071 luuj (1 januari 2006). Hoei liek aan de Maas, op de plaats woa de Hoyoux oetkump in dees rivier, óngevaer hauverwaegs tösje Name en Luuk. Bie de gemeinte huère ouch de deilgemeintes Ben-Ahin en Tihange; wiejer kerne zint Neuville-sous-Huy en Statte.

[bewirk] Functies

Fontein Li Bassinia

Hoei ies 'n verzörgingscentrum veur de umgeving. De plaats haet metaalindustrie. In Tihange liek 'n groate kerncentrale. Wiejer ies de sjtad 'n toeristische besjtumming.

[bewirk] Sjtadsbeeld en bezeenswaerdighede

De ouw sjtad liek op de rechteroever van de Maas en haet väöl ouw geboewe. De collegiaal kèrk Notre-Dame sjtamp oet de 14e ièw en ies geboewd in hoaggotische sjtiel. Ze haet 'ne belangrieke kèrksjat. Op de Groate Mert, veur 't sjtadhoes oet 1766, sjteit de fontein Li Bassinia, die deils oet 't begin van de 15e ièw ies. 't Fort van Hoei ies geboewd in 1818 en domineert de sjtad.

[bewirk] Historie

Hoei weurt veur 't ièrsj vermeld in 966. In 985 woort de sjtad en 't graafsjap woavan zie hoofsjtad waor door graaf Ansfrid aan 't prinsbisdóm Luuk gegeve. In 1066 kreeg Hoei 't sjtatuut van Gooj Sjtad.

In de mieddelièwe waore handel, wol- en metaalindustrie belangrieke inkómstebrónne. Door häör sjtrategische liegking woort de sjtad dèks aangevalle. 't Fort, oarsjprónkelik al oet de 9e ièw, woort in 1717 aafgebroke meh in 1818 door de Hollendersj weer opgeboewd.

[bewirk] Evenemente

't Fort gezeen vanaaf de Groate Mert

De fièste van Hoei were um de zeve jaor gehouwte. D'r ies ónder andere op 15 augustus 'n processie woabie 't beeld van Maria van Sarte door de sjtraote gedrage weurt. De ièrsjvolgende fièste zint in 2012.

Hoei ies de finishplaats van de fietsrenwedsjtried Waalse Pijl; de aankóms liek bovenaan de Moer van Hoei.