Cleopatra VII
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
Cleopatra VII Philopator (Jannewari 69 v. Chr. - 12 augustus 30 v. Chr.) waor de farao vaan het awwe Egypte, 't lèste lid vaan de Ptolemaïsche dynastie en dus de lèste Hellenistische heerser euver Egypte. Ouch al heet ze dezelfde naom es väöle andere Egyptische keuninginne, toch weurt zie gewoenlik aongeduid es Cleopatra, en al häör veurgenger met dezelfde naom zien mierendeils vergete.
Es co-heerser euver Egypte same met häöre vaajer (Ptolemeus XII Auletes), häör broor/echgenoot Ptolemeus XIII, en later häöre zoon Caesarion, euverleefde Cleopatra 'nne coup oetgedach door de hoflui vaan häör broor, consemeerde zie 'n verhawwing met Julius Caesar die häöre greep op de troen verstevigde, en, nao de moord op Caesar, verboond ze ziech met Marcus Anthonius, mèt wee zie 'ne twieling kreeg. Later is ze getrowd met Marcus Anthonius en kreeg 'ne andere zoon. Alles bij mekaar had Cleopatra 4 kinder, 3 vaan Anthonius en 1 vaan Caesar. Oet 't huwelek met häör broor kaome gein kinder.
Naodat Octavianus, rivaal vaan Anthonius en wetteleke opvolger vaan Caesar, de volle mach vaan Rome tegte Egypte aonbrach, benaom Cleopatra ziech vaan 't leve op 12 augustus, 30 v. Chr.. Häör naolaotensjap euverleefde in de vörm vaan väöle dramatiseringe vaan häör verhaol, boe oonder William Shakespeare's Anthony and Cleopatra en versjèllende moderne films.
Inhawd |
[bewirk] Leve
Cleopatra (Grieks veur Vaoders glory) waor de derde dochter vaan keuning Ptolemeus XII Auletes en nao ziene doed in 51 v. Chr. volgde zie häöm op same mèt häör broor Ptolemeus XIII. Zie trowde met häöm en consemeerde 't huwelek um häöre greep op de troen te verstevige.
[bewirk] Vaan de troen gestoete en weer trök met Julius Caesar
Al gaw kaom d'r ooneinigheid in 't huwelek, es Cleopatra ziech steeds mie ging affisjere es de alleinheerser vaan Egypte, door decrete allein oet te geve en munte te sloon zoonder zoonder de naom vaan häör broor/echgenoot d'r op. In reactie pleegde 'nne groop vaan hoflui, oonder aonvooring vaan de eunuch Pothinus, 'n staotsgreep en verdreef Cleopatra oet Egypte.
In 't naojaor vaan 48 v. Chr. maakde Ptolemeus evels de fout um ziech te minge in de aongelegenhede vaan Rome. Heer gaof oonderdaak aon Pompeius toen dee vluchte veur Julius Caesar aon het eind vaan 't ierste triumviraat, mèh heer leet Pompeius vermoorde um e wit veutje te hole bij Caesar. Caesar voond dees verraod zoe verachtelek dat heer de Egyptische hoofstad innaom en ziech benömde es arbiter in 't dispuut tösse Ptolemeus en Cleopatra euver de troensbestijging. Nao 'nne korte oorlog boe-in Ptolemeus 't leve leet, plaotste Caesar Cleopatra trök op de troen, same mèt 'n ander broor, Ptolemeus XIV, es co-heerser.
Caesar euverwinterde in Egypte, en Cleopatra maakde dao good gebruuk vaan door zien minnares te weure. Dao-oet kaom 'nne zoon genaomd Caesarion, Grieks veur kleine Caesar. Evels, Caesar weigerde 't keend te erkinne en adopteerde Octavianus es ziene zoon. Cleopatra en Caesarion waore op bezeuk in Rome zjus toen Caesar vermoord woort, boenao zie trök nao Egypte vluchte. Dao steerf kort daonao Ptolemeus XIV, waorsjijnlik vergiftegd door Cleopatra. Zie benumde häöre zoon Caesarion snel tot co-heerser.
[bewirk] Marcus Anthonius, oondergaank en doed
In 42 v. Chr. reep Marcus Anthonius, ein vaan de triumvirs die aon de mach waore in Rome in 't machsvacuum nao d'n doed vaan Caesar, Cleopatra bij ziech in Tarsus um häör te oondervraoge euver häör loyaliteit. Cleopatra kaom dao aon met e groet gevolg, en zie charmeerde Anthonius zoeveul, dat heer d'r veur koos um de winter vaan 42 v. Chr. - 41 v. Chr. in Alexandrië met häör door te bringe. Tiedes deze winter woort zie zwanger vaan 'nne twieling, die Cleopatra Selene en Alexander Helios genump woorte. Veer jaor later kaom Anthonius nog es langs, op weeg um oorlog te voere met de Parthe, en zie vernuide hun relatie. Vaanoaf dat memint zow Alexandrië zien thoes zien.
Oondertösse greuide in Rome 't oongenoege euver Anthonius zien in hun ouge sjendaolig gedraag. Octavianus euvertuigde de Senaat um 'nne oorlog tege Egypte te beginne. In 31 v. Chr. stoonte de legers vaan Anthonius tegeneuver de Romeine in 'ne zieslaag veur de kös vaan Actium. Cleopatra waor dao met 'n vloot vaan häör eige, meh toen zie zaog dat Anthonius d'n slaag aon 't verleere waor, vluchte ze. Nao de Slaag bij Actium veel Octavianus Egypte binne. Toen heer Alexandrië naderde deserteerde de legers vaan Anthonius euver naor de kant vaan Octavianus. Zoewel CLeopatra es Anthonius pleegde zelfmoord, Cleopatra door ziech door 'n slang te laote vergiftege. Cleopatra's zoon vaan Caesar, Caesarion, woort geëxecuteerd door Octavianus. De drei kinder vaan Cleopatra en Anthonius woorte gespaord, trökgenome naor Rome en opgevood door de vrow vaan Anthonius, Octavia.
[bewirk] Extern links
- Cleopatra on the Web - Zoe'n 470 bronne, awwe en moderne aofbeelding incluis.
- Cleopatra VII Philopator Antieke bronne
- Cleopatra VII (VI) at LacusCurtius — (Chapter XIII of E. R. Bevan's Hoes vaan Ptolemy, 1923)
- Cleopatra - 'n Victoriaans kinderbook vaan Jacob Abbott, 1852, Project Gutenberg editie.
- Genealogie vaan Cleopatra VII
- James Grout: Cleopatra, deil vaan de Encyclopædia Romana
