Mario Pei
De Wikipedia, le encyclopedia libere
Mario Pei, linguista e philosopho de linguage, comenciava su carriera de inseniante a City College de New York.
Nascite in Roma, Italia, Mario Andrew Pei (1901-1978), como multe italianos de ille epocha, veniva con su familia a New York City in 1908. Mario sequeva in le passos de su patre qui con su extensive fundation scholar naturalmente incoragiava su filio a poner un alte valor in le education, assi ducente le in attender multe e varie scholas parochial includente le Jesuit Xavier High School in Manhattan. Ille esseva un brillante studente; desde su graduation del schola secundari ille parlava cinque linguas fluentemente e ille continuava a saper parlar 30, e anque esseva familiar con le syntaxe e le vocabulario de plus de 100 linguas. Ille recipeva su baccalaureato ab City College de New York e un doctorato ab Columbia University in 1937 ubi ille apprendeva sanskrito, slavonico ecclesiastic antique, e francese antique.
In 1923, ille comenciava inseniar linguas in City College in New York, e in 1928 ille publicava un traduction in anglese de Vittoria Ermete de Fiori titulate "Mussolini: The Man of Destiny". In 1937, ille se adjungeva al departimento de linguas romance in Columbia Univeristy, e quatro annos plus tarde ille publicava le libro "The Italian Language". Su facilitate con linguas esseva multo requirite durante le Secunde Guerra Mundial, e secundo Pei ille serviva como consultor linguistic al Bureau de Guerra de Information e le Bureau de Servicios Strategic. In iste capacitates ille scribeva libros de inseniamento e cursos e guidas linguistic.
Quando ille laborava como professor de philologia romance a Columbia University, Pei scribeva plus de 50 libros super linguas includente alcun titulos que deveniva multo popular como "The Story of Language" (1949). Su fortia esseva su facilitate in describer le structura de linguas in un maniera facilemente comprendite, fascinante e intertenente. Con le publication, in 1952, per Pei del libro "The Story of English" ille delineava le evolution del anglese e illo deveniva anque un libro multo popular. In addition, Pei laborava in un serie de libros de guida in varie linguas le quales recipeva multe attention. Pei anque esseva cognoscite per su supporto del studio de un lingua in particular, le Esperanto. Ille proponeva que, in addition a lor proprie e lingua maternal, omne infantes debeva esser inseniate un altere lingua in commun pro le promotion del amicitate e comprension mutue.
