Guerra franco-indigena
De Wikipedia, le encyclopedia libere
- Version audio disponibile. Ascolta iste articulo in forma parlate.
(Adjuta: Como sonar le files .OGG?)
Le Guerra franco-indigena es le quarte in un serie de guerras colonial inter le franceses e le britannos, cognoscite como le guerras franco-indigena. Iste guerra esseva contemporanee con le Guerra de septe annos (1756 - 1763), sed comenciava de facto in 1754 quando un expedition britannic sub le locotenente general Braddock interprendeva un campania contra le franceses e lor alliatos indigena ("indianos"). Iste expedition incontrava le 9 de julio 1755 un imboscada a Monongahela e esseva annihilate. Le curso del guerra durante le prime annos esseva disastrose al britannos non preparate pro un guerra in le silvas nordamerican e non disponente de bastante truppas ben trainate. Le alliatos indigena disponeva de soldatos experte in le tacticas de infanteria legier. In ultra, le generales britannic esseva tanto colpate de panico post cata adversitate que illes se retraheva immediatemente in lor fortalessas.
Le assedio le plus notori es le del Fortalessa de William Henry, prendite per le franceses in 1757. Le assedio ha devenite famose per le libro The Last of the Mohicans que etiam esseva filmate. Al britannos vincite esseva permittite de retraher se ma durante lor retraction illes suffreva multe attaccos per le indianos vindicative.
In 1758 appareva un altere general britannic, le juvene officiero James Wolfe. Determinate a expeller le franceses pro sempre, ille comenciava un campania aggressive, conquirente le Fortalessa de Louisbourg le mesme anno. Ille attingeva post le Battalia de Quebec in 1759 le victoria final contra le armea francese. Le franceses se rendeva in 1760, e durante negotiationes in 1763 (le Pace de Hubertusburg), le colonias esseva definitivemente adjudicate al britannos.
In 1763 le chef tribal Pontiac organisava alcun tribos in un alliantia pro expeller le britannos. Sed post alcun successos, le revolta – cognoscite posteriormente como le Rebellion de Pontiac – se extingueva, e le tribos se redispersava in 1764. Pontiac esseva assassinate. Ben que le rebellion non habeva successo, illo indicava le fragilitate del pace in America del Nord. Le multe battalias habeva costate multe homines al tribos indigena, e le parve communitates, in contrasto con le communitates blanc florescente, a pena se recuperava de ille colpos.
[modificar] Vide etiam
- Lista de guerras
- Guerras franco-indigena
