Azores
De Wikipedia, le encyclopedia libere
Le Azores (os Açores[1] in le lingua portugese) es un gruppo de insulas portugese situate in le medio del Oceano Atlantic, circa 1 500 km de Lisbona e circa 3 900 km al est del costa de America del Nord.
Le archipelago se extende in le area del parallello que passa per Lisbona (39º, 43'/39º, 55' Latitude Nord), dante le un climate moderate, con oscillation annual moderate. Le novem insulas ha un area total de 2 355 km². Lor areas individual coperi inter 747 km² (São Miguel) e 17 km² (Corvo).
Iste archipelago es parte del cordillera submarin que se extende ab Irlanda pro le sud e sud-west, con orientation sensibilemente parallel al inflexion del costas continental.
Le solo azorian se presenta multo accidentate, con lineas de relievo orientate in le direction est-west.
Le origine vulcanic de tote le insulas es revelate per lor conos vulcanic e lor crateres. Pico, un vulcano de 2 351 metros in alto, que da le nomine al insula, ha le plus grande altitude in le Azores. Anque le origine vulcanic del Azores ha su expression maxime in le insula de São Miguel, in le famose "Valle del Furnas" e ha su plus recente activitate in le "Vulcano del Capelinhos", in le insula de Faial, in 1957.
In 1992 le population del Azores contava 238 000 personas con un densitate de 106 personas per kilometro quadrate.
Le novem insulas es dividite in tres gruppos:
- Le Gruppo Oriental de São Miguel e Santa Maria
- Le Gruppo Central de Terceira, Graciosa, São Jorge, Pico e Faial
- Le Gruppo Occidental de Flores e Corvo.
Il esseva in 1492 que Christophoro Columbo faceva un stop in le insulas in via al "Indias" (plus tarde recognoscite como le "nove mundo").
Comenciante in 1868, Portugal super-imprimeva su timbros postal pro le insulas con le nomine "AÇORES". Inter 1892 e 1906, illo anque imprimeva timbros postal separate pro le tres districtos administrative in le insulas.
- Angra que consisteva de Terceira, São Jorge, e Graciosa, con le capital in Angra do Heroismo in le insula de Terceira.
- Horta que consisteva de Pico, Faial, Flores, e Corvo, con le capital in Horta in le insula de Faial.
- Ponta Delgada que consisteva de São Miguel e Santa Maria, con le capital in Ponta Delgada in le insula de São Miguel.
De 1938 a 1978, le archipelago esseva dividite in tres districtos, multo equivalente (excepto in area) a illos in le territorio de Portugal in le Peninsula iberic. Le division esseva arbitrari, e non sequeva le gruppos natural de insulas, ma reflecteva le ubication de cata capital de districto in le citates plus grande (necun de illos in le Gruppo Occidental de insulas).
In 1976 le Azores deveniva un Region Autonome e le districtos de Angra, Horta, Ponta Delgada esseva supprimite.
[modificar] Notas
- ↑ Curiositate: Le nomine Açor in portugese es le nomine del astor (Accipiter gentilis), le qual se trova etiam in le bandiera.
[modificar] Ligamines esterne
- Sito official del Azores
- (anglese) The Azores Islands
