Carlos Amil
Na Galipedia, a wikipedia en galego.
Carlos Amil Nace en A Coruña, no ano 1959. Director de cinema, autor da película de culto Blanca Madison (2000). Ten en preparación un novo proxecto, A casa da luz, adaptación da novela do mesmo título de Xabier P. Docampo, da que é guionista o propio director.
Amil comeza a súa carreira no equipo de cine Imaxe, a finais dos setenta do século XX, e é un dos fundadores da empresa de video Trama, canteira fundamental do audiovisual galego pola que pasaron entre outros Xavier Villaverde, Miguel Castelo, Pancho Casal, Mateo Meléndrez, Guillermo Represa, Xesús Vecino, Jorge Algora, Suso Montero e outros. Da época de Trama, cómpre salientar a súa colaboración como cámara nos multipremiados traballos Veneno Puro e Viuda Gómez, de Villaverde, ou Salvamento e socorrismo, de Antón Reixa.
Contratado por VideoVoz Tv, é un dos primeiros profesionais en traballar para a TVG en tarefas de director, realizador e montador en programas como O monacato en Galicia, ou Lendas. Tamén comparte tarefas de guionista nalgúns deses programas. Perante moitos anos desenvolveu un importante traballo pedagóxico como mestre de montaxe e de realización de cinema e televisión na Escola de Imaxe e Son de A Coruña, formando equipo con nomes fundamentais do audiovisual galego como Manolo González, Daniel Domínguez, Ignacio Pardo, Pepe Coira, Carlos Oro entre outros.
Preto de 30 anos de oficio para quen, como el mesmo escribiu nalgunha ocasión, gosta de perder o seu tempo imaxinando historias e escribindo guións para o cine e a televisión, avalan a traxectoria dun cineasta todoterreo: guionista, montador e director.
