Avelino Pousa Antelo

Na Galipedia, a wikipedia en galego.

Avelino Pousa Antelo (Barcala, 14 de maio de 1914) é un mestre, agrarista, político e escritor galego. É o actual presidente da Fundación Castelao.

Naceu na aldea de Arzón^[1], de onde procedía súa nai mentres seu pai, comerciante itinerante, procedía do Carballiño. Estudou no seminario de Santiago de Compostela cinco anos^[2]. Pousa Antelo asitiu o 10 de maio de 1931 ao mitin de promoción galega que se realizou no Teatro Principal de Santiago e no que participaron os principais líderes galeguistas, segundo as súas propias declaracións^[3] ese feito, e en especial o discurso de Castelao, marcouno politicamente, achegándose ao galeguismo. Tras saír do seminario ingresou na Escola Normal para realizar estudos de maxisterio, ao tempo que militaba nas Mocedades Galeguistas e comezaba a escribir os seus primeiros artigos para La Voz de Barcala. En 1936 aprobou as oposicións de maxisterio pero a Guerra Civil impediulle que collese praza ao anular o réxime franquista as oposicións. Estudou na Misión Biolóxica de Galicia e desde 1948 dirixiu a Escola Agrícola de Granxa Barreiros, fundada por Antonio Fernández López, na que se organizaba cursiños de formación agropecuaria para mestres do rural. Entre 1955 e 1960 foi mestre e Técnico Agrícola do Laboratorio do Cabido Insular na Orotava en Tenerife^[4]. En 1960 traballou brevemente en Galicia para unha empresa de semente ata que obtivo un traballo en Zaragoza como director dunha empresa cooperativa gandeira. En 1970 volve a Galicia como mestre en Pontecesures. Coa caída de Franco, Pousa Antelo sumouse ás iniciativas para revivir o vello Partido Galeguista, e en 1978 participou na constitución do novo Partido Galeguista do que foi elixido secretario xeral e pouco despois presidente ata 1983. Participou na constitución e foi un dos principais artífices do Patronato do Pedrón de Ouro^[5].

[editar] Obras

Temas de agricultura , Lugo, 1951
Cooperativa de explotación comunitaria para unha parroquial rural galega, Vigo, 1968
¿Valen ou non as cooperativas de esplotación comunitaria para o campo galego?, Vigo, 1971
A escola agrícola da granxa Barreiros, Sada, 1988
Fiestra, Santiago de Compostela, 1992
Galicia, tarefa urxente, Barcelona, 1992
O entroido en Perruscallos, Silleda, 2002