Grinzer Museum
Ut Wikipedy
It hjoeddeiske Grinzer Museum (Nederlânsk: Groninger Museum) waard iepene yn 1994 en hat syn plak krige yn it opfallende gebou tsjin it Sintraal Stasjon fan Grins oer. As in eilân leit it yn it "Verbindingskanaal" en is middels twa fytser/kuierbregjes mei de wâl ferbûn.
It gebou bestiet út trije parten en is troch in kombinaasje fan arsjitekten boud wurden. De ferantwurdlike arsjitekten binne: Alessandro Mendini, Philippe Starck, it duo Coop Himmelb(l)au en Michele de Lucchi. It gebou is delsetten yn de postmoderne boustyl. It eastlike paviljoen wurdt ek wol in foarbyld fan it dekonstruktivisme neamd.
- It westlike paviljûn, mei û.o. de fêste eksposysje fan de Ploeg-keunstners, lykas de samling Japansk en Sineesk porselyn.
- Yn it midden it haadgebou mei de yngong, it hege goudkleurige depot en it restaurant.
- It eastlike paviljoen mei wikseljende eksposysjes.
De wikseljende eksposysjes bestrike it spektrum fan argeologyske fynsten oanten mei de moderne keunst. Yn it ferline binne der eksposysjes yn it Grinzer Museum hâlden dy't in soad folk luts. In foarbyld wie de samling wurken fan de Russyske skilder Ylja Repin, in eksposysje yn 2003, iepene troch de âld-presidint Michail Gorbatsjow. Yn it begjin fan 2006 wie der in útstalling fan Prof. Van Giffen, de ferneamde terpenûndersiker en faaks de meast wichtige Nederlânske argeolooch fan de 20ste ieu.
