Vilote

De Vichipedie, la enciclopedie libare dute in marilenghe.

La vilote e je une forme di cjant a trê o plui vôs nassude tal XV secul in Friûl. Formis di cjant derivadis de vilote si son pandudis intes regjon convicinis, in Austrie, in Slovenie e in Venit.

[cambie] La vilote tradizionâl furlane

I cjants furlans par solit a no jerin scrits, la int e jere usade a tegniju a ments ancje parcè tantis voltis a no si saveve scriviju. Passant di bocje in bocje, al capitave che a vignissin fûr variantis e alterazions, fintremai a un vêr mudament dal cjant che dal imprin, al jere daspò deventât un altri.

Cjants pardabon di lavôr a no 'ndi è, se no chei che a clamin il lavôr. Il nestri mont contadin al jere sotan e par tant puartât a un bon acet de sô cundizion di vite tant di vê miôr il cjant di consolazion e di lamentazion o di burì fûr a front une forme di ligrie sfrontade e, vedudis lis cundizions materiâls, un poc sfuarçade.

La vilote autentiche e antighe a jere salacor fate in doi viers di dîs silabis, ma si je pandude e sparniçade cuant che à cjatât il sô model in cuatri otonaris o miôr in dôs cubis di otonaris.

La stesse vilote, daûr dal paîs e de ocasion, e vignive eseguide (cjantant e balant) in maniere difarente o vignive adatade, e cheste a je propite une da lis carateristichis dal cjant popolâr furlan: la pussibilitât di comedâ il test poetic, la linie de melodie fintremai a la struture armoniche seont da bisugne dai scoltadôrs o, parcè no, dai esecutôrs.

L'autôr al jere intal imprin une persone, di sigûr cun tant di non e cognon, ma la interpretazion a jere par plui corâl e il patrimoni subite coletîf. Il cjant po stâi che al vignìs tacât a une vôs e po dopo l'acompagnament polifonic al rivave bessôl da pît in somp. La polifonie e à marcât di lunc il cjant popolâr furlan cuintri chel di altris bandis talianis dulà che il cjant al jere monodic, e se ancje a plui vôs, par otave e al unisûn.

La tradizion polifoniche furlane si pandeve dulà che un prin, tenôr o sopran, al tacave un cjant, e il secont al intierçave oreglânle a sec e il bas al leve di lunc par toniche e dominant. Chê maniere li di cjantâ a je al dì di vuê un grum rare.

Lis armonizazions e lis corâls dal nûfcent a àn vût il merit di vê nobilitât la musiche, che in efiets a jere puarine, e documentât la sô esistence ma àn, al stes timp, tabiade la frescje usance di cjantâ liberementri e di inventâ, metint dut intes mans di predis, esperts, mistirants e, no simpri, musiciscj.