Val Cjanâl
De Vichipedie, la enciclopedie libare dute in marilenghe.
La Val Cjanâl e si cjate al confin dal Friûl cun la Austrie e la Slovenie e e je traviersade dal torent Fele. Al corispuint plui o mancul ai comuns di Tarvis, Malborghèt e a chê part di teritori dal comun di Pontebe che e sta a çampe de flumere Pontebane (il cors d'aghe che al segnave il confin tra Italie e Imperi Asburgjic prime de Prime Vuere Mondiâl). La carateristiche principâl de val e je il jessi cuadrilengâl: in Val Cjanâl a si fevele talian, todesc, sloven e furlan. Un esempli concret di chest plurilenghisim a puedin jessi i toponims, come chei te tabele.
| Talian | Furlan | Sloven | Todesc |
|---|---|---|---|
| Bagni di Lusnizza | Lusnìts | Lužnica | Lusnitz |
| Camporosso | Cjampros | Žabnice | Saifnitz |
| Cucco | Cuc | Kuk | Kúk |
| Malborghetto | Malborghèt | Naborjet | Malburgeth |
| Pontebba | Pontebe | Tablja | Pontafel |
| S. Caterina | Sante Catarìne | Šenkatríja | Sankt Kathrein |
| S.Leopoldo | S. Leopold | Lipalja vas | Leopoldskirchen |
| Tarvisio | Tarvis | Trbiž | Tarvis |
| Ugovizza | Ugovize | Ukve | Uggowitz |
| Valbruna | Valbrune | Ovčja vas | Wolfsbach |
[cambie] Istorie
La Val Cjanâl e à fat part par secui dal vescovât di Bamberghe e plui tart dal Imperi asburgjic. E je jentrade tal Ream d'Italie dome daspò la Prime Vuere Mondiâl. Il periodi fassist al è stat particularmentri dûr pale val: al regjim nazionalist no i lave propri ju il plurilinguisim locâl, che al jere radicât zaromai di secui (la Val Cjanâl e je pont di incuintri ideâl par i ceps lenghistics romanç, slâf e gjermanic): par chest a forin mandâts a "colonizâ" la val une vore di talians, che prime dal prin conflit mondial a costituivin dome l' 11 % dale popolazion. Cun acuarts bilaterâi di Mussolini cun Hitler (clamâts par talian "Opzioni"), i abitants che a favelavin sloven o todesc a forin clamâts pôcs agns plui tard a sielzi ce ch'a volevin fâ: o vendi lis lôr tignudis e deventâ citadins todescs, o restâ inte val e deventâ citadins completamentri di culture taliane. Interessant al è notâ che ancje la int che e favelave sloven e je stade fate rientrâ in chest acuart. Daspò la vuere un pocje di int e je tornade, ma tancj a si son fats une gnove vite e cumò a vivin inaltrò.
Nonostant al segni robe di casson, la Val Cjanâl no e fas culturalmentri part dale Cjargne.
