Cjabie
De Vichipedie, la enciclopedie libare dute in marilenghe.
Cjabie e je une biele frazion dal cumun di Darte, in Cjargne.
Sgrufuiade intune concje a su par ju 750 metris sul livel da mâr, a cjale jù la valade dal Bût fintremai a Tumieç.
Par rivâ a Cjabie al covente di cjapâ la statâl 52bis che da Tumieç e rive fintremai a Mont di Crôs sul confin cu l'Austrie. Dopo vot chilometris e passât Zui, tigninsi a gjestre, a si jentre a Darte e dopo 500 metris, a lì la che al jere il vecjo albierc ;Savoia", a si cjape ancjemò a gjestre, la strade comunâl che e puarte, just apont, a Cjabie. Subit prime di rivâ su, cuant che il cîl si vierç e la campagne si slargje, fermaìsi te localitât di "Codes" par cjalâ ju la valade dal Bût di dulà che si viodin i paîs di Cedarcjis, Cjarugnê, Dimponç, Navarlôns e Tumieç.
Cjabie e je famose soredut pe fieste de Madone di Dicembar e pe sgnape di brundui o sespis, denominade "Sliwovitz" e otignude da un vecjo mût di distilazion inventât, disin cussì, in tai paîs slâfs, forsit in Slovenie. Vonde impuartant e cognossude, inte gleseute di San Zorç, si pues viodi la pale di San Gotart piturade dal Grassi. In dì di vuê a Cjabie, a vivin al incirche 250 animis, ma timp indaûr la popolazion e jere rivade ancje fin a 350-400 di lôr cuntune sglavinade di fruts, par cui a jerin l'asîl e ancje lis scuelis elementârs. L'ativitât principâl de int, fintremai tai agns sessante-setante, e jere chê agricule, divierse di che de plane, par vie de tiere cussì puare, tant che un grum di int e scugnive lâ ator pal mont a vore, come che ben al conte Leonardo Zanier.
Dai agns otante in ca la vite a je cambiade in miôr ancje pal fat che a son ladis in miôr lis condizions economichis de Italie e alc ancje de Cjargne. In ogni câs al è vonde facil, ancje in zornade di vuê, di intivâsi a viodi alc da vite di une volte soredut da part dai vecjos o chei indenant cui agns, che a son restâts tacâts al paîs, ma ancje di cualchi zovin che al crôt ancjemò in chel mût di vivi o che lu fâs par tignî su lis tradizions.
[cambie] Galarie fotografiche : Lûcs e tradizions
 Cjabie soresere |
 Vecjo cjasâl |
 Lavares di gnot |
 Zornade d'inviâr in Sonvile |
 Vecjo cjamìn di foghere in clap |
 I cortaleits |
 Predean |
 Cjagnon |
 Cjagnon |
 La tradizion di purcitâ in cjase (chei da foto a son dacordo) |
