Carlo Michelstädter
De Vichipedie, la enciclopedie libare dute in marilenghe.
Carlo Michelstaedter al nas a Gurize ai 3 di jugn dal 1887, intune famee di origjins israelitis. Frut une vore scontrôs e sierât, al studià in tal liceu di Gurize e daspò te universitât di Viene, iscrivintsi a la facultât di matematiche. Ma ben adore al si trasferì a Florence, lì che al fasè amicizie cui zovins dal Istitût di Studis Superiôrs. tal 1905 ancje lui si iscrivè tal Istitût, sielzint la facultât di Letaris. Al incentrà i siei studiis soredut su un indiriz antîc, acuisint une cognossince otime dal latin e dal grêc, ma cence mai meti in bande il grant mestri dal sô pinsîr, Giacomo Leopardi, de sô filosofie al cjaparà in man plui di cualchi idee. Il titul de sô tesi di lauree al jere "La rettorica e la persuasione"; ai 17 di Otubar dal 1910 le spedì de sô cjase di Gurize a Florence par pueste, daspò al ingrampà il revolvar che al tignive in cjase e si copà cuntun colp in bocje. Al veve dome 23 agns.
[cambie] La retoriche e la persuasion
Tal so pinsîr, la vite de societât e je une mancjance di vite, dal moment che l'om al è sclâf dal Diu dai plasès, che al fas viodi al om plasès e inlusions che no son vêrs, ma che a lui a parin reâi. La vite sociâl e je regolade de Retoriche, che e je l'insiemi des sôs convenzions, che a sfuarcin l'om viers la strade dai plasès, che lu distrain dal viodi la veretât, ven a stai che la vite e je fate di dolôr. La Persuasion si pues otignî dome vivint di moment in moment cence pensâ al indoman: dome in cheste maniere si pues pierdi la pôre de muart. Ise la Persuasion alore une cundizion mentâl positive? No dal dut: la Persuasion e je fie de capacitât di insumiâsi che a vevin i antîcs tal pinsîr di Leopardi. Une midisine al mâl di vivi che però come la Retoriche e sburte l'om a gjavâ vie i voi de veretât. Cuale ise alore, la diference? Parcè Carlo preferissial la Persuasion ae Retoriche? La rispueste e je une: la Retoriche e ven dal alt, des regulis e des convenzions de societât, invezit la Persuasion e je il risultât di un resonament consapevul che ognidun di nô al à il podê di fâ. La Retoriche ti rive intor cuant che tu nassis; la Persuasion e je un pont di arîf cuant che tu cressis. Ma la maiorance dai oms a preferìs la Retoriche, parcè che, stant che nissune des dôs ti da la felicitât (la felicitât no je pussibil ta chest univiers, par Michelstädter) almancul la Retoriche ti da une ombre, i plasès,e cun chei si crôt di podê jemplâ il vueit che in veretât e je la esistence. Un vueit che al nas dal fat che l'om al è dome une part come dutis chês altris tal univiers,ai vôi de Nature al à il stes valôr di une furmie(al è il Discors de Nature cu l'Islandês di Leopardi!), e la sô sole utilitât e sta tal nassi e tal murì, puartant indenant l'eterni cicli de vite, il mieç pal cuâl la Nature si manten simpri identiche tes sôs continuis trasformazions.
