Bataie di Cjaurêt
De Vichipedie, la enciclopedie libare dute in marilenghe.
La bataie di Cjaurêt e fo une bataie combatude dal 24 di Otubar al 9 di Novembar dal 1917 vie pe prime vuere mondiâl dal esercit talian cuintri i austri-ongjaresis e i todescs, cognossudis ancje come Imperis centrâi.
Indis |
[cambie] Storie
[cambie] Situazion prime de bataie
Daspò des undis bataiis dal Lusinç, sucedudis tal arc di doi agns, dal 1915 al 1917, l'esercit talian al veve strenzût intune smuarse i bataions austriacs: no si tratave di vitoriis decisivis, ma la armade imperiâl e jere une vore sflanchinade.
I austriacs, comandâts dal gjenerâl Otto von Below, a organizarin une cuintri-ofensive che e sarès scugnude partî il 22 di Otubar.
Dal cjant lôr, i gjenerâi talians Luigi Cadorna e Luigi Capello a vevin dôs strategjiis difensivis diviersis, e al moment dal lôr incuintri, sot dal atac, ogni cambiament di idee al si dimostrà impussibil.
[cambie] La bataie
La gnot jenfri il 23 e il 24 di Otubar, aes 2.00, l'esercit di von Below al scomençà cui prins tîrs di artilierie. La ofensive e continuà fin ae buinore, cence però une buine difese de bande taliane. La sere dal stes dì la prime e la seconde linie difensive talianis a jerin ladis in fas, e la bataie si podeve considerâ za pierdude.
Il 25 di Otubar al viodè la concuiste da lis monts plui strategjicamentri impuartantis par il control de zone de bataie e, soredut, de planure furlane. Lis trupis austri-ongjaresis a ocuparin la Stol, la Sant Martin e la Mataiûr.
Lis zornadis seguintis l'esercit al scomençà la so avanzade te planure furlane, cirint - tal timp istès - di rompi lis liniis te Cjargne par rivâ a superâ lis trupis talianis prime che superassin il Tiliment; in realtât, a cause de resistence taliane, il tramai mortâl nol scrocà.
La linie difensive taliane, in chest mût, e zirucà fin daûr de Plâf. I austriacs no rivarin mai a passâ ancje chest flum par vie dal intervent des trupis aleadis (francesis, inglesis e americanis) in jutori dai talians, e pe scjarsetât di munizions e di supuart marziâl a cause de distance de linie di confin.
La rote di Cjaurêt e costà ai talians 11.000 muarts, 19.000 ferîts, 300.000 presonîrs, 400.000 disertôrs e sbandâts, oltri che a miârs di munizions e di tocs di artilierie.
