Zipi y Zape
Dendi Güiquipeya
Zipi y Zape son, dendi finalis de los añus 50, un referenti nel tebeu español, criaus pol José Escobar. Estus dos hemelus, que se deferéncian entri sí pol sel unu rúbiu (Zipi) i otru morenu (Zape), se caraiterizaban prencipalmenti polas sus hechurias que tinian lugal en cualisquiel ocassión.
Algotrus pressonahis unius a las aventuras desti pal de zagalinus eran Don Pantuflo (pairi las criaturas i catedráticu en Filatélia i Colombufília), Doña Jaimita (la sufriora mairi i ama e casa), Peloto, el palancón la crassi i inimigu los hemelus), Lechuzo, el leal aliau de Peloto, el su supidotau primu Sapientín i su tia Miguelita, u los señoris Plómez (los amigus pesaus sus pairis, que sempri chegan de vesita nel piol momentu). Otru pressonahi carismáticu es Don Minervo, el severu professol.
"Zipi y Zape" es la segunda estória española mas traucia, endispués de "Mortadelo y Filemón". Los capítulus suelin sel cortus, dentri 1 i 8 páhinas, inque tamién las ain de 44 u 48, cumu es el chascu d'"El tonel del tiempo", i s'arrehuntan en tebeus de tapa branda dunas 60 páhinas. Tamién s'án hechu vidiuhuegus relacionaus colas aventuras de Zipi i Zape.
Los nombris de los protagonistas viinin de la parabra zipizape, que senifica "farfollu".
Continius |
[eital] Presonahis
[eital] La família
- Don Pantuflo Zapatilla es el esposu Doña Jaimita i pairi Zipi i Zape. Catedráticu de Filatélia i Colombufília, entri las sus aficionis destacan el humal en pipa i leyel los periódicus. Nació un 22 d'Otubri.
- Doña Jaimita Llobregat: Esposa de Don Pantuflo i mairi los hemelus. Es arta, dergá i morena, i se caraiteriza pol lleval un laçu colorau nel pelu.
- Miguelita: Es la helmana de Doña Jaimita, i mairi de Sapientín.
- Sapientín: es el supidotau primu de Zipi i Zape, ihu únicu de Miguelita, helmana de Doña Jaimita. Mas alicortau qu'ellus, (le peta mas estuyal que salil colos collácius) i pocu apassionau pol fubu (sempri huega cumu porteru). Es ahostigau costantimenti pol Zipi i Zape paque les haga los deberis, inque él sempri logra evitalus. Visti de negru con un laçu i lleva gafas d'estuyosu, sin las que nu ve.
- Agüelus Zapatilla: Son los pairis de Don Pantuflo i agüelus de los hemelus. Nuna tupa aventuras les hazin regalus.
[eital] La escuela
- Don Minervo: Es el maestru destus hemelus tan curiosus. Se caraiteriza prencipalmenti pola su disciprina a la ora de dessaminal (quasi sempri los manda a casa con un 0) i polos castigus a qu'imponia a los dos protagonistas, heneralmenti consistentis en mantenel angunus librus apilaus en ca braçu.
- Peloto Chivátez: Es compañeru crassi i inimigu los hemelus. Cumu el su própiu nombri endica, es el lambuzu la crassi. Es un pressonahi dergau, con el pelu morenu i largu. Se caraiteriza prencipalmenti pola su narís abuçá que le confiiri essi pelitasqui de "malu" enas istorietas.
- Lechuzo: Esti pressonahi, ya mas moelnu, es un zagal d'entelihéncia nolmal qu'es el mehol amigu i aliau de Peloto. Dispuestu sempri a hazelis passal a Zipi i Zape una mala esperéncia, siguirá fielmenti las órdinis de Peloto, lo que le hadrá metelsi nuna tupa pobremas. Se llama Lechuzo pol su gran paiciu con esta avi.
- Doña Espátula: Es una siñora verrugosa, portera el coléhiu de Zipi i Zape, i esposa de Don Minervo.
[eital] Algotrus
- Siñoris Plómez: Son los amigus cansinus los pairis los hemelus, Don Pantuflo i Doña Jaimita. Son un matrimoñu que se caraiteriza polas sus temerosas vesitas un dia detelminau la semana a casa de Zipi i Zape pa merendillal.
- Don Ángel: Es el pulicia el bárriu nel que vivin Zipi i Zape.
- Doctor Pildorín: Méicu de família que tiin una consurta nel bárriu. Polo heneral hazi vesitas a domicíliu a la família Zapatilla.
- El Manitas de Uranio: Es un lairón que s'eica a lañal polas casas el bárriu, entri ellas la de Zipi i Zape, inque los dos hemelus suelin estruncal los sus robus.
- Fakirín: Fakirín es el ihu duna familia faquiris. Fakirín quiiri sel faquil cumu su pairi i sueli piil a Zipi i Zape que l'entrenin p'acostumbralsi a aguantal el dolol. Posteriolmenti sedrá coñociu cumu "Lelo Tontinez" i su pairi aparentementi se llamará "Alí Kates"
- Nati i Tina: Son presonahis que apaicin ena úrtima etapa de "Zipi y Zape". Se trata de dos zagalas hemelas, una rúbia (Nati) i otra morena (Tina), de las que Zipi i Zape están namorainus.
Tamién apaicin algotrus pressonahis d'Escobar, cumu Carpanta, Petra u el perru Toby
[eital] Atihus
- El Guerrero Errante:Artículu al tentu Zipi y Zape nuna bitácura.
- Un Tebeo con Otro Nombre:Artículu "Zipi y Zape" nuna bitácura al tentu tebeus.