Joseba Egibar
Wikipedia(e)tik
Joseba Egibar Artola (Andoain, 1959ko azaroaren 23a) EAJko eusko legebiltzarkidea eta Gipuzku Buru Batzarreko presidentea da. 1998tik EAJko bozeramailea da Eusko Legebiltzarrean. Andoaingo udal funtzionaria da ogibidez, eta Zuzenbidean lizentziatua da.
Ibilbide politikoa
1974an EAJko gazte erakundean (EGI) militatzeari ekin zion, artean talde hori legez kanpokoa zelarik. 1985 eta 1989 urte bitartean Eusko Jaurlaritzaren Gipuzkoako Lurralde Antolakuntza eta Etxebizitza, eta, Kultura ordezkari izan zen.
1987an EAJ-PNVren Gipuzko Buru Batzarreko Presidente aukeratu zuten. Segidako aukeretan kargu bererako izendatuko zuten eta hortantxe jarraituko du 2000ko urtarrila arte. 2004ko maiatzetik hona zeregin honetan dihardu berriro. 1987tik Euzkadi Buru Batzarraren kide da, EAJren Aberri Kontseilu, eta, 1987 eta 2004 urte bitartean organo honen bozeramaile izan zen. Gainera, 1990tik eusko legebiltzarkide da eta Gasteizko Ganbaran EAJ-PNVren bozeramaile 1998tik.
Gipuzku Buru Batzarrean (GBB, EAJren Gipuzkoako zuzendaritza) hainbat kargu izan ditu. 2000. urtean, Euzkadi Buru Batzarreko (EBB, EAJren exekutiba) kide bilakatu zen, Euskara eta Hezkuntza, nahiz Kirolak eta Kultura arloetako arduraduna izanez. 2003 eta 2004 artean, EBBren presidentetzarako lehiatu zen Josu Jon Imazen aurrean. Hedabideen aburuz, Joseba Egibar ordura arte Xabier Arzalluzek gidatutako sektore soberanista-ren ordezkaria zen. EBBko buru, ordea, Josu Jon Imaz bilakatu zen.
2006ko irailean, Josu Jon Imazek politikagintza utziko zuela iragarri eta gero, Egibarrek EBBko presidentetzarako lehiara ez zela aurkeztuko adierazi zuen.
Lizartzako (Gipuzkoa) alkate ere izan zen 2004tik 2007ko maiatzaera arte, herri horretako ezker abertzaleko hautes plataforma legez kanporatua izan eta gero.
