Ryanair
Oddi ar Wicipedia
Cwmni teithiau awyrennau Gwyddelig yw Ryanair. Daeth i enwogrwydd wedi i'r cwmni ddechrau cynnig cwmni awyrennau rhad iawn a chystadlu'n erbyn y cwmnïau traddodiadol megis British Airways ac Aer Lingus. Mae wedi denu canmoliaeth a beirniadaeth, er i bobl fanteisio ar brisiau sydd fel arfer yn is na'r arferol, mae'r diffyg gwasanaeth yn ystod y daith, ynghyd â'r costau am gludo gormod yn eich bagiau neu'r hysbysebu 'camarweiniol' wedi denu'r wobr am y cwmni hedfan sy'n cael ei gasáu fwyaf yn Ewrop. Mae'r cwmni'n dueddol o ddefnyddio meysydd awyr eilradd yn hytrach na phrif feysydd awyr, ac mae weithiau'n derbyn grantiau neu daliadau oddi wrth awdurdodau lleol am hedfan yno. Unwaith eto, mae hyn wedi denu beirniadaeth, yn enwedig o du Air France. Er gwaethaf hyn, mae'r cwmni'n parhau i dyfu ac mae'i elw wedi cynyddu eto eleni.
