Ізяслаў Уладзіміравіч

З Вікіпедыя.

Ізяслаў Уладзіміравіч (979 — 1001, Полацк), князь полацкі (986–1001), унук Рагвалода, сын Рагнеды Рагвалодаўны і Уладзіміра Святаславіча.

Магчыма чацвёрты па старшынстве сын Уладзіміра. Паводле меркавання некаторых даследчыкаў, адзінае дзіцё Рагнеды^[1] (Гл.падр. Рагнеда#Колькасць дзяцей). У 986 пасля замаху Рагнеды на жыццё Уладзіміра Ізяслаў па навучэнні маці сімвалічна, з мечам у руках, выступіў у яе абарону. Гэтае заступніцтва ўразіла Уладзіміра, ён звярнуўся да рады да сваіх баяраў, якія параілі яму вярнуць Ізяслава разам з маці ў Полацк. Згодна крыніц Уладзімір заснаваў для Ізяслава новы горад — Ізяслаўль (цяпер Заслаўе). На полацкім стальцы Ізяслаў, відаць, вёў актыўную ўнутры і знешнепалітычную дзейнасць, бо ў Ноўгарадзе пад час археалагічных раскопак (1954) знойдзена яго пячатка. Памёр у 1001, пакінуўшы ад невядомай жонкі двух сыноў — Усяслава і Брачыслава. Глядзець у ПСРЛ: I, 34, 52, 55, 131; II, 250, 259, 261, V, 2, 112, 124; VII, 28, 231, 294, 313, 317; IX, 57, 68, 155-156.

Пячатка Ізяслава, якая з'яўляецца найстаражытнейшым помнікам пісьменства ва Усходняй Еўропе, выканана з незвычайных для падобных помнікаў матэрыялаў — звычайна пячаткі адціскаліся на круглых металічных балванках (булах) і прывешваліся да грамат на шнурках, пячатка Ізяслава адціснутая на палосцы свінцу і была прывешаная да граматы на скураным дзягужку. На аверсе змешчана мадыфікаваны знак "Трызуб" з надпісам ΝΖAC**OΖO (ΝΖACΛΑOZO). Рэверс без выявы з надпісам ГРΑΔ***** (ГРΑΔΠΛΤСΚ). Памеры у шырыню 38 мм, у даўжыню 24-30 мм. Таўшчыня палосцы 11 мм, у месцы адбітка 8 мм.

[правіць] Нашчадкі

• Усяслаў Ізяславіч (990-я—1003), князь полацкі (1001—1003)
• Брачыслаў Ізяславіч (990-я—1044), князь полацкі (1003—1044)

---