Google

Aus Wikipedia

Der Àrtikl is im Dialekt „Owaöstareichisch“ gschriem worn.

Google, bzw. d Fiama Google Inc., is da Bedraiba fu da bekãntastn und wødwaid am maistn fawentn Intanet-Suachmaschin. Dé fu de zwoa Schdudenten Larry Page und Sergey Brin fu da Stanford University in Kalifoanien 1998 gemainsãm grünte Fiama håd ian Siz in Mountain View im kalifoanischn Silicon Valley und håd im Moment iwa 13.000 Ãngschdöde auf da gãnzn Wød.

Mitlawaile betraibt de Google Inc. néd neta ia Google-Suachmaschin, sondan nu fü ãndare Services, wia zum Beispüi de Gratis-Webmail-Funkzion Gmail, s Google Earth und s Google Maps, Google News, Google Video und nu fü ãndare. Google is momentan fia de User komplet gratis und finanziad si duach Weabung, foa oim de sogenãntn Google Ads.

Inhaltsverzeichnis 1 Gschicht 1.1 Da Ãfãng 1.2 De Gründa 1.3 Da Intanet-Boom 2 Produkte 2.1 Toolbar 2.2 Calendar 2.3 Picasa Web Albums 2.4 Blogger 2.5 News 2.6 Scholar 2.7 Gmail 2.8 Talk 2.9 Google Video 2.10 Google Maps 2.11 Google Earth 2.12 Google Moon 2.13 Google Mars 2.14 AdWords 2.15 AdSense 2.16 Sunstigs 3 Fiamenfilosofi 4 Kritik 4.1 Datnschuz 4.2 Fåischinfoamazion 4.3 Zensur 4.4 Terror 4.5 Monopol 5 Schau a unta 6 Gwøn

[dro werkln] Gschicht

[dro werkln] Da Ãfãng

Dés Gãnze håd im Joa 1996 ãgfãngt ois Foaschungsprojekt fu dé zwoa Doktoaratsschdudentn Larry Page und Sergey Brin ãn da Stanford University in Kalifoanien. Sé hãm de Ide ghåbt, das a Suachmaschin, dé dé Falinkungen zwischn faschidane Saitn im Intanet untasuacht und so dé Suacheagebnisse beweat, zu waid bessare Eagebnisse kema dad wia dé zu dea Zaid fawentn Algoritmen. Dé ãndan Suachmaschinen hãm dé Drefa hauptsechlich daduach beweat, wia oft a Begrif auf õana Saitn fiakimt. Gfinklte Webdesigner hãm dés gwusst und õafåch oft gsuachde Wöata in eana Saitn dopit und draifåch âibaut, néta damid s efda gfunden wean.

Iwazaigt dafã, das dé Saitn, zu dea dé maistn Links fian, woaschainlich a de intressantasde und relevantaste sâi wiad, hãm dé zwõa eana Ide ausprowiad und amåi aufn Server fu da Stanford Uni a Suachmaschin mid dém sogenãnnt "Hyperlink Vector Voting"-Sisdem inschdaliad. Am Ãnfãng woa de Domain fu deara Suachmaschin google.stanford.edu und de Domain google.com is eascht am 15. Septemba 1997 regisdriad woan. D Fiama Google Inc. is nu a Joa schbeda am 7. Septemba 1998 mid Siz in ana Garasch fu am Fraind fu de zwõa in Menlo Park in da Nehe fu San Francisco grünt woan. Dés Startkapital dafia hãm de zwõa hauptsechlich fu eanara Familie und Frain kriagt und a 100.000 Dollar fum Andy Bechtolsheim, õam fu de Gründa fu Sun Microsystems.

[dro werkln] De Gründa

Da Larry Page, geboan 1973 in Lansing in Michigan, und da Sergey Brin, a 1973 in Moskau in Russlãnd geboan (Russisch: Сергей Брин), woan zu da Ãnfãngszaid gråd amåi 23 Joa åid und gråd im Featigwean fum Schdudian.

Da Larry Page is in Michigan zeascht in a Montessori-Schui gãnga, woa nåcha auf de East Lansing High School und is schbéda dãn auf da Michigan State University gwén, wo a õana fu de easchdn woa, dea doat in Informatik an Dokda gmåcht håd. Sâi Bruada, da Carl Victor Page Junior, woa übrigens õana fu de Midbegründa fu da Fiama eGroups, dé schbeda im Joa 2000 an Yahoo! fakauft woan is. Auf da Stanford University håd da Larry Page dãn an Sergey Brin kena gleant, mid dém a de patentiate PageRank-Technologi fia Suach-Algoritmen eafundn håd, dé dé Basis fu da Google-Suachmaschin is.

Da Sergey Brin is mid sechs Joa fu Russlãnd nåch Amearika kema und woa dãn a in ana Montessori-Schui in Adelphi in Maryland. Sâi Fåda, dea Professoa auf da Universidet in Maryland woa, håd eam schã ois klõan Bua recht fia Matematik begaisdan kina und so is da Sergey Brin a nåch da Highschool zum Infoamatik-Schdudian auf d University Maryland gãnga. Nåchdém a doat sain Bachelor gmåcht håd, håd a a Schdipendium fia s Master-Schdudium an da Stanford University kriagt. In Master håd a 1995 featig gmåcht, wia a glaichzaitig schã mid saim Dokdoarat ãgfãngt håd. Ea is übrigens nu oiwai ois Dokdoarats-Schdudent inskribiat, wai a wéng deara gãnzn Google-Gschicht nia damid featig woan is.

[dro werkln] Da Intanet-Boom

De zwoate Høftn fu de 90a Joa woa a dé Zaid, wo in Kalifoanien und aigentli auf da gãnzn Wød da grosse Intanet-Boom ausbrocha is. Dés Intanet is fåst jéds Monad exponenziel gressa woan, dés hoast, es håd ima mea Saitn und ima mea Infoamazion online gém, woduach a da Bedoaf nåch ana gschaidn Suachmaschin recht gros woa. Dåmåis håd s an Haufn faschidane Suachmaschinen gém, fu Alta Vista üwa Infoseek, Metacrawler bis Yahoo, und es håd so ausgschaud, wia wãn si Yahoo géngiwa dé ãndan duachsezn dad. Yahoo is a schã 1996 an de Börse gãnga und woa dåmåis da risngrose Hype.

De Suachmaschinen zu deara Zaid hãm eanare Services a oiwai waida ausbaud und san richtige Portale mid an Haufn Links, Regista und Weabeãnzaign woan. Kõana hed si dåmåis dåcht, das a komplet naiche Suachmaschin de schã håibwégs etabliadn då nu Moaktãndail wéganema kã. Google is åwa genau dén umgekeadn Wég gãnga, mid ana gãns simplen åbgschbektn Startsaitn one fü Grafik und ém den naichn innovativn Suach-Algoritmus. Daduach woa de Suach auf Google fü schnøla wia bai dé ãndan und håd a brauchboarare Eagebnisse bråcht. So is Google oiwai belibta und gressa woan.

Wia im Joa 2000 s Blåzn fu da grosn Intanet-Blåsn an da Börse woa, is de Eufori komplet in Køla gschdiazt und fü Fiamen, de kuaz dafoa nu hoch in Hümi globt woan san und in Gød gschwuma san, woan auf õa Måi plaite und san fum Moakt faschwundn. Google åwa håd de Tuabulenzn recht unbeschådet iwaschdãndn und is so zum wødwaidn Moaktfiara ois belibtasde Suachmaschin woan.

[dro werkln] Produkte

[dro werkln] Toolbar

Des is a Funkzion, dé ma åwalådn und inschdalian kã und mid dé Browser Firefox und Internet Explorer funkzioniad und im Browser a zusezliche Weakzaiglaistn âifügt mid ana Google Suach Box, am Phishing Schuz, Pop-Up Blocker und a da Meglichkait fia Laid mid aigena Intanetsaitn, das ma Button måcha kã.

[dro werkln] Calendar

Des is a Online Kalenda zum Fawåitn fu de peasönlichn Termine, mid Earinnarungsfunkzion. Kã ma sogoa auf Hendis fawendn. Dé Funkzion is åwa datnschuzmessig umschdridn, wai natiali dãn foi fü Infoamazion iwa õan søwa aufn Google Server gschbaichat is.

[dro werkln] Picasa Web Albums

Des is a Ãwendung, wo ma søwa gschossene Fotos online schdøn kã und Web Albums måcha kã. Dea Service is in Google integriad woan, wia s 2004 de Fiama Picasa kauft hãm.

[dro werkln] Blogger

Des is a Sisdem zum Easchdön und Beoawatn fu Blogs, des 1999 fu da Fiama Pyra Labs eafundn woan is. 2003 håd Google Pyra Labs kauft. 2006 is de naichasde Blogger Version in da Betawariantn aussakema, mid dea a engültig ole User auf dé Server fu Google tranfariad woan san. Mid Blogger kã ma entweda Blogs auf blogspot.com easchdön oda de Sofware benuzn fia Blogs, dé ma auf aigene Domains hosted.

[dro werkln] News

Google News is a Funkzion, mid dea ma dé naichastn Nåchrichtn aus online Zaidungen duachfoastn kã bzw. saine aigenen Intaressensgebite âischdön kã, zu dénan ma Infoamzionen und Naiigkaitn håm mechad. Funkzionad a auf Hendis.

[dro werkln] Scholar

Des is a bsondare Suachfunkzion fu Google, mid dea ma schbeziel nåch wissnschåftliche Artikl und uniweasiteare Zaidschriftn, Diplomoawaitn, Disseatazionen usw. suachn kã. Funkzioniad jez a auf Daidsch.

[dro werkln] Gmail

Gmail is da Webmail Service fu Google, dea am 1. Abrü 2004 gschdart woan is. Zu dea Zaid woan Hotmail und Yahoo-Mail de waidast fabraitadstn Webmail Services, und wia Google ãnkündigt håd, das baim Gmail a jeda User â Gigabyte Webspace håd, hãm de mearan Laid glaubt, dés is a Abrüscheaz - foa oim, wai Google schã efda am 1. Abrü klõane Pflanzarain gmåcht håd. Désmåi wo dés åwa eanst gmõand, und mitlaile håd jeda User sogoa zwà Gigabyte Webspace gratis dabai (fia Attachments, gschbaichate e-Mails, usw.)

[dro werkln] Talk

Google Talk is a Voice over IP Program, so endlich wia Skype.

[dro werkln] Google Video

Google Video is a gratis Hosting fu Videos und glaichzaitig a a Suachmaschin fia ole Videos im gãnzn Intanet. Dé Funkzion wü kloarawais Youtube a weng in Eafoig schdraitig måch und håd désweng a boa Foataile, damid s User ãnlokn. Bai Google Video is de Auflösung gressa und ma kã lengare Videos aufilådn (bai Youtube is fia noamle User dés Limit zehn Minutn).

Im Nowemba 2006 håd Google Youtube iwahaupst komplet kauft und dén Service in Google Video integriad. Youtube is åwa a waidahin nu unta saina Domain aufruafboa. Mea unta Youtube.

[dro werkln] Google Maps

Mid de Google Maps håd dé Fiama zum easdn Måi ãgfãngt, Lãndkoatn und Satelitnfotos ois Service zum ãnbitn. Google Maps funkzioniad im Intanet Browser und ma braucht kõa Software åwalådn und nix inschdalian. Am Ãfãng woa s Koatnmatrial auf de USA bschrenkt, åwa mitlawaile kã ma si de gãnze Wød ãschaun, dailwais in foa hocha Detailschdufn. Saitdém s åwa s Google Earth gibt, is dés Intaresse an Google Maps a weng zrukgãnga.

[dro werkln] Google Earth

Is a virtueller Globus, bai dém ma si Satelitnfotos fu da gãnzn Wød ãschaun kã. Dea revoluzioneare naiche Service håd auf da õan Saitn fü begaistate Fans kriagt und is auf da ãndan Saitn a heftig kritisiad woan, wai jez a jéda detailiataste Infoamzionen iwa jédn Oat fu da Wød aussafindn kã, zum Baischbü wo genau milidearische Ãnlågn san, wia a Flughåfn fu om genau ausschaud, wo de Zufoatswége zu beschdimte Gebeude und Schdådfiatl san, usw. Foa oim in dé USA, åwa a in ãndare Lenda håds då Diskusionen gém, ob dés néd fu Kriminele und Terroristn misbraucht wean kintad. Fia Google Earth muas ma si a aigens klõans Program åwalådn und inschdalian.

Google Earth fawent Satelitnfotos, dé öfentlich zuagenglich san, zum Beispüi fu da NASA, da airopeischn Raumfoatbehöade und ãndare private Ãnbita, und fabinz zu ana flechndékendn Åbbüdung fu da gãnzn Wød. Dé Auflösung is åwa néd iwaroi glaich, zum Beispüi is in Ésdaraich de Detailiadhaid néd so hoch wia in Daidschlãnd, aussa in grose Schdete wia Wean und Såizbuag. Mea unta Google Earth.

[dro werkln] Google Moon

Dés is déssøwe wia Google Earth, neta das ma si då dé Owaflechn fum Mond ãschaun kã.

[dro werkln] Google Mars

Dés is déssøwe wia Google Earth, neta das ma si då dé Owaflechn fum Mars ãschaun kã.

[dro werkln] AdWords

Dés is a Program fia Laid, dé auf Google Weabung schåitn woin, damid ma gezilt doat saine Ãnzaign plazian kã, wo ma s gean håm mecht. Mid Adwords kã ma a dé Ãnzaign søwa easchdön.

[dro werkln] AdSense

Des is a Service fia Laid, dé søwa a Intanetsaitn mid fü Traffic hãm und duach Online-Weabung Gød fadina woin, auf per-Klick Basis oda auf per-Dausnd-View Basis.

[dro werkln] Sunstigs

Google is mitlawaile so gros und håd so fü naiche Services entwükid oda ãndane Fiamen kauft und dénan eanare Services in Google integriad, das dé Listn nu waid lenga sâi kintad. Tailwais gibz a naiche Services fu Google, de zeascht in de USA gschdart wean und east schbeda dãn a in Europa zua Fafügung schdengan.

google is wos gscheids es preissn

[dro werkln] Fiamenfilosofi

Die Fiama Google Inc. is a bsondas dafia bekãnt, das doat de Untanemenskultua und dés Fiamenklima nu oiwai so is wia bai ãndare Fiamen ind da Zaid fum grosn Intanet-Boom. Dés Motto fu Google is "Don't be evil", dés hoast, ma soid néd unfraindlich zu dé Kolegn, de Kundn und dé User sai, åwa a ned ådrad und hintalisdig, wia s sunst im Gscheftslém oft da Fåi is. Drai Richtlinien, dé dé Fiama eanare Ãngschdödn midgibt, san zum Baischbü: "You can make money without doing evil" (Ma kã Gød fadina, one das ma bes sai muas), "You can be serious without a suit" (Ma kã eansthåft sai, one das ma an Ãnzug ãhåd) und "Work should be challenging and the challenge should be fun" (Oawad soid a Hearausfoadarung sai und a Hearausfoadrung soid Schbas måcha).

Õan Dåg fu da Oawadswocha håd jéda Ãngschdöde zua frain Fafügung, an dém a in da Fiama dõa kã, wås a wü - zum Baischbü bai intresante Projekt fu ãndare Åbtailungen middõa oda aigene Projekde ausprowian, etc. Daduach soin a nu mea Inovazionen entschdê wia sunst e schã. Google is åwa a kritisiad woan, wai zum Baischbü mãnche Sisdem Administratoan im Joa neta 35.000 US-Dollar fadinan, wås bai de daian Brais in Kalifoanien goa ned fü is. An Haufn Midoawata fu Google hãm åwa alõa schã déswéng a guads Gød gmåcht, wais néman Gehåit a nu Akzien kriagt hãm, dé in de lezdn Joa wansinig hoch gschding san.

Nåchn Börsngãng fu Google im August 2004, bai dém de zwoa Gründa, da Larry Page und da Sergey Brin, iwa Nåcht zu Multimilionean woan san - zumindest am Papia - hãm dé zwoa komplet auf a Gehåit fazicht und griang saitdém neta a pro-forma-Gehåit fu õam Dollar pro Monad.

[dro werkln] Kritik

Google is a schã a boa Måi schoaf kritisiad woan, foa oim fu Laid, dé si fian Datnschuz âisézn und fu Menschnrechtsaktivistn.

[dro werkln] Datnschuz

Google sãmit ole Datn fu de Suachãnfrågn fu eanare User, damid s eanan Service fabessan kinan. Mãnche Mechanismen funkzionian neta déswéng so guad, wai Google unglaubliche Datnmengen håd, mid denans eanare Algoritmen fabessan kinan. Zum Baischbü des Tool zum Ausbessan fu Tipfela funkzioniad aso, dé Raiung fu de Hits wiad a fu dé Datn beainflus (auf den Drefa, wo de Laid am ehastn hîklikn, dea wiad dãn waida nåch om graid) und a dés automatische Iwasezungstool funkzioniad duach Faglaich fu dé gsãmitn Datn.

Wai Google de Datn åwa praktisch unendlich lãng schbaichan kã, is a dé Gfoa fu am Misbrauch gém. Entweda das Google søwa Laid ausschbioniad, dass dé Datn an ãndare Fiamen fakaufn, oda das Regiarungen fu mãnche Lenda - a dé USA mid eanare Anti-Terror-Gsez - Google zwinga kintadn, de Datn zum aussaruka. So an Fåi håd s zwoa dawai nu nia gém, zumindest is nix publik woan, åwa alõa schã de Meglichkaid beunruigt so mãnche Laid.

[dro werkln] Fåischinfoamazion

Bai dé Suacheagebnis in Google wiad natiali ois aufglist, wås unta am beschdimtn Begrif im Intanet zum finden is. Då is natiali a an Haufn fåische Infoamazion dabai, oda rassisdische Intanetsaitn, Saitn mid earotische Inhåite, Faschwörungsteorin, ois. Google håd grundsezlich kõan Füta âibaud, dea so wås aussafütat. In mãnche Lenda is Google åwa fum Gsez hea fapflicht, mãnche Intanetsaitn oda gãnze Sever zum schbean. In Daidschlãnd kã ma zum Baischbü mãnche Nazi-Saitn néd iwa Google findn.

[dro werkln] Zensur

Wia Google in Kina âigschding is, mid ana spezieln Variantn fia kinesische User, håd dé Fiama a Åbkomen mid da komunisdischn Regiarung fu da Foiksrepublik Kina schliassn miassn. Neta unta da Bedingung, das beschdimte Inhåite und Saitn in Kina gschbead san, håd de Regiarung ealaubt, das Google doat sain Service bedraim deaf - sunst warad in Kina Google (a de internazionale Domain) gschbead woan. Damid duad åwa Google praktisch mid baim kinesischn Zensursisdem im Intanet, dés fahindat, das saine Bürga unaingschrenkt und frai zu ole Infoamazionen kema kinan, dés im Intanet gibt.

[dro werkln] Terror

Foa oim da Service fu Google Earth håd ainige Regiarungen und doat foa oim de Gehaimdinst und s Milidea aufhoacha låssn. Dé woan iwahaupst néd fro driwa, das auf õa Måi jéda, dea an Intanet-Zugãng håd, fåst genau so guade Satelitn-Fotos si ãschaun kã, wia foahea neta sé. Es is oft gsågt woan, das mid Google Earth auslendische Schbion und a Terroristn gãns laicht Infoamazionen aussagriang kinan und Sabotasch oda an Ãnschlåg plana kinan. Said am Zaidl håd Google ãngfãng, das beschdimte hoagliche Objekde auf Google Earth åbdékt san oda nima in ana guadn Auflösung zum seng san. Dés widarum håd ãndare Laid gschdiad, dé glai wida "Zensur" gschrian hãm.

[dro werkln] Monopol

Google is mitlawaile dé wødwaid gresde Suachmaschin. In mãnche Lenda is Google so belibt, das in Moakt fia Suachmaschinen fåst komplet kontrolian (in Schbanien benuzn ãngeblich 99 Prozent vo ole User Google und kõa ãndare Suachmaschin). A bai ãndare Services is Google so gros woan, das doat wødwaid da gresde am Moakt san. Foa oim duach de exdrem guade Entwiklung fu de Google-Akzien an da Börse kã de Fiama a ãndare Intanet-Fiamen und Konkurentn gãns laicht aufkaufn und so nu gressa wean.

Mãnche seng darin schã a gfealichs Potenzial, das Google sâi Monopol amåi ausnuzn kintad, zum Schådn fu dé User, und foadan déswéng das de Wetbeweabsbehöadn in de USA und in da EU aktiv wean und wås dagéng dan. Dawai is åwa nu nix Konkréts in dé Richdung gscheng, und wia ma a schã bai Microsoft gseng håd, kinan si soiche juarisdischn Gschichtn joarelãng dahîziang, one das wås dabai aussakimt.

[dro werkln] Schau a unta

• Youtube
• Google Earth
• Gmail

[dro werkln] Gwøn

• Dokumentar-Video iwa Google fum Ilsbrand van Veelen und Martij Kieft
• „Jenseits von Gut und Böse“, Telepolis, 18. September 2006
• „Weltmacht Google“ stern, 22. Mai 2006, Dossier
• „Die Geburt eines Stars“, manager magazin, 30. März 2006, im Google seine Anfänge
• „Google drückt sich vor Verantwortung“, Tagesschau, 1. Februar 2006, Interview mitm Marcel Machill (siehe auch Gatekeeper)
• „Die Welt ist keineswegs alles, was Google auflistet“, Telepolis, 25. Oktober 2002