Fonema prepalatal fricatibo xordo
De Biquipedia
O Fonema prepalatal fricatibo xordo se representa en aragonés con una X.
[editar] Orichen
Lo suyo orichen puet estar:
- A X latina, que se pronunziaba /KS/:
- BUXUS > buxo
- O grupo latín -SK-:
- COGNOSCERE > conoxer
- ASKIATA > xata
- O grupo latín PS
- IPSE > ixe
- O grupo latín -SSY-:
- BASIARE > Baxar
- PASSERE > Paxaro
- PISSIARE > Pixar
- Poquismos casos á partir d'a S- inizial, que en cheneral se conserba:
- SURDUS > xordo
En aragonés meyebal s'ha representato en cheneral como x, pero tamién de muitas atras trazas, x, yx, ix, ss, is, sc, ç, de belunas d'estas en da notizia Manuel Alvar en lo suyo libro "Estudios sobre el dialecto [sic] aragonés".
[editar] Barians y normalizazión
Lo suyo orichen en aragonés coinzide en cheneral con atros idiomas d'arredol, e como en estos atros idiomas, a x puet tener una i acompañanta pronunziando-se ix. En aragonés se produze en l'aria oriental. Ixa i no ye un catalanismo fonetico como s'ha dito, car en mozarabe toledano se deziba faisa (faxa) y en franzés se diz laiser (dixar). Seguntes a grafía de Uesca ixa i no s'ha d'escribir fueras d'os casos en que se quiera espresar la pronunziazión reyal (lo que se fa n'esto ye lo contrario que en catalán, on s'escribe encara que los fablans orientals no la pronunzien).
En o dialeuto semontanés e un poquet en atros, lo fonema prepalatal fricatibo xordo s'ha perdito (dependendo d'as palabras) y en cuenta d'este fonema s'emplega lo fonema prepalatal africato xordo, que se representa graficament por ch. Seguntes a grafía de Uesca n'estos casos s'ha d'escribir -x- encara que se pronunzie -ch-, fueras d'os casos en que se quiera espresar la pronunziazión reyal.
A x en castellán esdebinió una j belar en lo sieglo XVII. Los que manteneban l'aragonés dende allora han bisto tradizionalment que lo muitas palabras que ellos deziban con -x- en castellán se deziban con -j- (faxa-faja, cojo-coxo). Esto ha feito que i aiga rearagonesizazión incorreutas de castellanismos correspondiens á palabras en aragonés tienen -ll- u -ch-; por exemplo en bellas localidaz d'a Baxa Ribagorza mullar se castellanizó á mujar e dimpués s'ha rearagonesizato como muixar. Sin d'embargo esto se desbiene en pocas palabras. Asinas s'esplican barians como Xaca, Xabalín, de palabras que en aragonés d'antismás no teneban -x-. La palabra Eslexir ye un cruze entre l'aragonés meyebal Esleir e lo castellán Elexir (enantes de lo sieglo XVII) u Elegir (dende lo sieglo XVII).
En continazión territorial con l'aragonés ribagorzán, en catalán ribagorzán se documenta tamién muxar, pero á más baraixa (baralla en catalán) e sarraixó (panissola en catalán). En catalán de lo Matarraña se diz ventaixa en cuenta d' aventatge. Bellas palabras con -x- no etimolochica ni patrimonial en catalán han puesto plegar-ie cuan en castellán encara se pronunziaba la -x-, por exemplo en l'esotoponimo Xerès, azeptato en catalán normatibo.L'adaptazión de palabras castellanas cambeyando la J belar por X se clama Xeada en filolochía catalana.
Pero ye en balenzián on ye més común la xeada. Son formas muito estidillatas en lo balenzián cheneral palabras como aguixó, alaixa, aloixar, antoix, navaixa, e mesmo lo lesico normatibo ha replegato marraixa emoixarra. Los esotoponimos Navaixes e Soneixa en l'Alto Palanzia probablement tamién s'esplican asinas. Son més locals en balenzián abixorro, encaix, refaix, empuixar, arrempuixar, rempuixó, paixareta, eixambre, espeixisme, eixarretar, que sustituyen en bellas zonas a las palabras catalanas chenuinas.
Cuan en los años 1970 e 1980 empezipió la esfensa de l'aragonés, la chent dedicata á este quefer se trobó que en aragonés charrato los cultismos por un regular se prenen d'o castellán y se pronunzian con J belar como en castellán, e asinas se diz Biología, Región, Origen, Objetibo.
No i abió alcuerdo de como escribir estas palabras en aragonés normalizato, y los nioaragonesofablans entendioron que siempre podeban trobar la forma d'escribir una palabra en aragonés cambeyando la G, J por una X, plegando á estremos d'adaptar as palabras que en castellán rematan en -age como -axe, innorando que en aragonés esiste lo sufixo -ache (orache, mesache). Tamién s'escribioron con X los toponimos que prebaban de rearagonesizar como Xabalambre, Alfaxarín sin mirar que n'os testos meyebals yeran con J, e que a J de l'aragonés meyebal ye CH güei seguntes la grafía de Uesca.
En a luita por l'aragonés dialeutal por parte de fablans natibos tamién se cai n'este error. Los que esfienden lo cheso aplican lo prinzipio J castellana -> X en aragonés de forma sistematica, y s'ha plegato á beyer escrito relox, cuan esiste una casa en Echo conoxita como Lo relochero.
Escribir palabras como Oxetibo, Bioloxía, Colexio, Pribilexio, Orixen no tién chustificazión etimolochica, y se plega á contradizions entre chenetica y orixen, que se remontan á la mesma radiz.
