Fernando Lázaro Carreter

De Biquipedia

Fernando Lázaro Carreter (Zaragoza, 13 d'abril de 1923 - Madrid, 4 de marzo de 2004), yera un filologo, lingüista, y escritor aragonés. Yera estato direutor d'a Real Academia Española de la Lengua á o largo de siete añadas.

Yera naxito en Zaragoza o 13 d'abril de 1923, en o sino d'una familia con muitos binclos con o lugar de Magallón (Campo de Borxa, Zaragoza), de do yeran sus pais. Estudió Bachiller en o Instituto Goya de Zaragoza e Filosofía y Letras en a Unibersidá de Zaragoza ta continar dimpués en a sezión de Filolochía en a Unibersidá Complutense de Madrid, en do se lizenzió en Filolochía Romanica en 1945 e se dotoró en 1947. En 1949 otenió a catedrá de Lingüistica Cheneral e Critica Literaria en a Unibersidá de Salamanca. Astí permanexe dica 1971. En l'añada 1972 ocupa ra catedra de Luenga Española en a Unibersidá Autonoma de Madrid. Finalmén, en 1978 pasó ta ra Complutense de Madrid como catedratico de Gramatica Cheneral e Critica Literaria.

O suyo treballo en a dozenzia estió paralelo á o quefer de creyazión, cretica teyatral e publicazión d'estudios lingüisticos e literarios. Una d'as suyas primeras publicazions sobre temas lingüisticos estió El habla de Magallón. Notas para el estudio del aragonés vulgar (Zaragoza, IFC, 1945). Pero no siguió pon por ixas endrezeras d'a dialeutolochía. Se zentró en a istoriografía lingüistica, con obras como Las ideas lingüísticas en España durante el siglo XVIII (1949; bi ha nueba edizión en 1985), uno d'os suyos estudios más importans; u Crónica del Diccionario de Autoridades (1713 - 1740), que estió ro discurso d'ingreso en a RAE. En estudios propiamén lingüisticos, filolochicos e gramaticals, que se replegan prenzipalmén en Estudios de lingüística (1980). En ixa endrezera cal emponderar o Diccionario de términos lingüísticos (1963), importán obra de consulta, con muitas edizions, que contina fendo onra. Tamién en estudios sobre a luenga literaria, que se replegan más que más en Estudios de poética (La obra en sí) (1986), De poética y poéticas (1980), asinas como en obras más didauticas: ¿Qué es literatura? (1979), Cómo se comenta un texto literario (con E. Correa, 1989); u en comentarios concretos sobre grans creyadors, epocas u cheners literarios: Estilo barroco y personalidad creadora (1966; 1984), El Lazarillo de Tormes en la Picaresca (1973; 1983), Francisco de Quevedo, Vida del Buscón (edizión cretica, 1965, 1980), Introducción a la poesía de Vicente Aleixandre (1979), Clásicos españoles: de Garcilaso a los niños pícaros (2002).

Pero por o que ye más conoxito ye por dos cosas: 1) os libros de testo de luenga castellana e literatura ta Bachillerato y ESO, con os que muitos estudians españols han estudiato; 2) os articlos en os que con umor e somardonería creticaba os usos dolentos d'a luenga española, e que con o tetulo de "El dardo en la palabra" escribió en a prensa (primero en Informaciones, dimpués en ABC; en zagueras, en El País) e que replegó en libro en dos series: El dardo en la palabra (1997) y El nuevo dardo en la palabra (2003). No cal olbidar a suya cretica teyatral en a prensa, ni tampoco no a suya creyazión literaria en o cambo d'o teyatro popular: talmén ye poco conoxito e no ha intresato charrar-lo, pero estió autor de La ciudad no es para mí, que en zinta de zine protagonizó Paco Martínez Soria.

Ingresó en l'Academia de la Lengua Española en 1972 i estió ro suyo direutor entre 1991 e 1998. Lázaro Carreter se considera como un renobador e dinamizador d'a Real Academia Española: la ubrió á ra soziedá e á os meyos de comunicazión, asinas como á Latinoamerica; se preocupó por a finanziazión e potenzió a informatizazión, metendo en marcha dos "bancos de datos": O Corpus de referencia del español actual, que replega más de 95 millons de rechistros de testos escritos e fuens orals d'España e de Latinoamerica dende 1975, e o Corpus diacrónico del español, que replega más de 56 millons de rechistros d'o idioma español dende os comienzos d'a luenga dica 1975.

As suyas zenisas se tresladoron ta Magallón e se dixoron en o suyo fosal, ta que i escansen chunto con os restos de sus pais e d'os paisanos suyos.

[editar] Fuen

Francho Nagore Laín Fuellas d'informazión d'o Consello d'a Fabla Aragonesa, lum. 160 (marzo-abril 2004), p. 7