Consello d'a Fabla Aragonesa
De Biquipedia
O Consello d'a Fabla Aragonesa (C.F.A.) conoxito popularmén como "Consello", ye una asoziazión cultural naxita en 1976 e reconoxita legalmén en 1978, l'ambito territorial de a cuala ye Aragón.
As fins d'ista asoziazión son a esfensa, promozión, estudio y espardidura de l'aragonés en toz os suyos aspeutos:
Istoria, literatura, gramatica, lesico, toponimia, folclore, considerazión sozial e legal, pedagochía, didautica, amostranza, ezetra, parando espezial cuenta de o estudio, protezión e desembolique de totas as suyas barians locals e comarcals, as cualas son l'alazet de l'aragonés común u estándar.
O quefer de o Consello d'a Fabla Aragonesa s'alazeta en tres prenzipios:
1. Autitú rispetuosa enta ra reyalidá trilingüe d'Aragón.
2. No ascrizión coleutiba á dengún ligallo politico, sindical u relichioso.
3. Libertá ideyolochica de as presonas que lo forman.Ye de feito l'asoziazión de referenzia arredol de a luenga aragonesa en tota ra soziedá aragonesa, estando l'organo de consulta obligato por parti de as estituzions, en estar o referén normalizador e normatibizador de l'aragonés. Dende a suya creyazión, o Consello d'a Fabla Aragonesa ha treballato de rezio en a dinnificazión de o idioma aragonés, contribuyindo á creyar un estato d'opinión faborable arredol d'ista chicorrona luenga romanica y espardindo o suyo conoximiento á trabiés de publicazions bariatas, como Fuellas u Luenga e Fablas. Os organos de gubierno de o Consello d'a Fabla Aragonesa son l'Asambleya Cheneral de consellers e a Chunta Direutiba, cuala composizión e atribuzions amanexen reglatos en as Ordinazions de o Consello.
O autual Presidén, dende 2004, d'o Consello d'a Fabla Aragonesa ye Chusé Inazio Nabarro.
