Enguerino

De Biquipedia

L'enguerino ye o charrar local d'Enguera (Balenzia). A redolada d'Enguera dita La Canal de Nabarrés, se repobló con Nabarros, que i leboron a suya lengua y dixoron marca en a toponimia.

[editar] Descripzión

[editar] Fonetica

En Enguera, Nabarrés y Anna bi ha distinzión entre a -s- xorda de passar y a -s- sonora de casa, rabosa, teresa.

En Enguera no se-i aprezia pas seseyo, y á más conserba a pronunziazion meyebal de a z castellán-aragonesa; mantiene as ts y ds foneticas xordas (dantsa, atsucar) e sonoras (ondse, codsina).

En tota ixa zona debant dita bi ha oposizión de v fricatiba y b oclusiba, como en castellán meyebal ó como s'ha aconserbato en o balenzián autual. Esto amuestra que a b, v de a ortografía castellana no correspón con os fonemas d'o castellán meyebal:

• Exemplos: bever, aver, cavallo, vida, biga'.

(en o Cantar d'o mío Zid podemos leyer igual cavallo, cantava, haver, etc..)

Conserba a -x- aragonesa (y catalana), en ixe, cuxa y caixeta.

En Enguera bi ha casos de conserbazión de a ch- aragonesa, (chirar, chelar), de palatalizazión de a ll- inizial: llonganiza, llevantar.

Sin dembargo a F- inizial se pierde mesmo en aragonesismos que la gosan mantener en charrar baturro, (hiemo por fiemo). Ye curioso que l'infinitibo fer, que en Ayerbense ye castellanizato en fazer, en Enguerino se conserbe como "her".

[editar] Morfolochía

Tamién esiste un pasato perifrastico de tipo catalán: se'n va ir, (se'n marchó). Esto lo trobamos en ribagorzán, y ye una muestra de que l'aragonés puede agafar trazas morfolochicas d'o catalán estranias en castellán, porque la comunicazión d'entre as dos luengas ye más fazil.

A prinzipios de o sieglo XX se replegó en Enguera a forma verbal d'imperfeuto queriva, tipicamén aragonesa.

Como puede beyer-se se conserban muitas trazas aragonesas, que son comuns con o catalán, e ixo ye por o grau de contauto y integrazión que esiste dende fa muito tiempo con os balenzians catalanofablans (á lo contrario que no en a Balenzia castellana de Cofrentes-Utiel). En a redolada de Exatiba esiste un concurso literario con tres modalidaz: balenzián, castellán y dialeuto enguerino.