Colonizazión europeya d'America
De Biquipedia
A Colonizazión europeya d'America prenzipia á la fin d'o sieglo XV dimpués de que Cristofo Colombo i plegara en 1492 con o mezenazgo d'a Corona de Castiella. Dende l'inte, o Reino d'España, e más tardi os reinos de Portugal, Anglaterra, Franzia, e Países Baxos, conquistoron e colonizoron bels territorios e poblazions que ya abitaban en o continent.
Os reinos d'España e Portugal estioron os primers en reyalizar a conquista, e se asentoron prenzipalment en Zentroamerica e l'aria andina de Suramerica.
O Reino d'España estió a potenzia que mayor presenzia colonial imposó en America. Prenió posesión por a fuerza d'os dos grans imperios esistents en America en ixe momento, o Imperio Incaico en l'autual Perú e o Imperio Azteca en l'autual Mexico, establiendo-se en as suyas ziudaz. Dende astí controló una gran parti de Zentroamerica, e a zona andina suramericana dica la zona zentral de l'autual Chile. En America d'o Norte conquistó a peninsula d'a Florida e os autuals estatos de California, Nuebo Mexico, e atros territorios más. En o Caribe, dominó sobre tot Cuba, A Española, Puerto Rico, Chamaica, entre atras islas.
Portugal colonizó a mayor parti d'a francha costera atlantica d'o norte d'America d'o Sur, que más tardi serba o Estato de Brasil.
Anglaterra establió treze colonias en a francha costera atlantica nordamericana, antimás de colonizar bellas islas caribeñas e parti de Canadá.
Franzia ocupó l'autual Guayana Franzesa en Suramerica (encar baxo lo suyo dominio), Loisiana en o Golfo de Mexico, bellas islas d'o Caribe, e a rechión canadiense de Quebec.
Olanda establió colonias en Nordamerica (Nueba Amsterdam que dimpués serba Nueba York), norte d'America d'o Sur (Guyana olandesa, güé Surinam) e bels asentamientos en islas caribeñas (Antillas Neerlandesas e Aruba).
