Caballo (mitolochía)
De Biquipedia
Lo caballo ye un animalcarauteristico de las mitolochías de pueblos indoeuropeyos, turqueses y mongols. I aparixe con simbolochías solars, como caballos que tiban d'un carro que leba lo sol, u con simbolochías funerarias, como caballos que leban á os muertos ta lo més allá. La simbolochía funeraria de lo caballo ye deribata de la simbolochía solar, car lo caballo solar se leba lo sol ta un puesto fosco de l'ueste on remata lo día.
Las mitolochías perinencas han eredato de las mitolochías de los pueblos indoeuropeyos lo papel más que más funerario u psicopompo, á trabiés de los pueblos portadors de los Campos d'Urnas de la Edat de lo Bronze, y los Ibers y Zeltas de la Edat de lo Fierro.
[editar] Lo caballo en los mitos altoaragoneses
En los garrastolendas aragoneses bi ha un presonache conoxito como Caballet, un ome que encaxa en la suya zintura un caballo d'esparto u cartón.
Rafael Andolz documenta en Moriello de Monclús la istoria d'un caballo blanco y alato, bisto en la falsa d'una casa boltando arredol.
Atlánd l'encataire decretó que nomás se poderba alcanzar lo Palazio Machico de lo Mont Perdito con un caballo alato.
En bels puestos de la Bal d'Aragüés se charra d'un caballo con dos capezas tibando d'un carro cargato de trallos chigans. Una capeza ye de color blanco y l'atra negra, cadaguna preba de lebar lo cuerpo ta un costato diferent.
En atros lugars de lo Pirineu ye més estendita la creyenzia en lo carro de las almas u de los muertos.
[editar] Lo caballo en a mitolochía basca
En los mons de Zuberoa y de la Baxa Nabarra cuan amanix lo caballo sin capeza gosa estar un anunzio de la muerte. En las bals de lo Nibe, de lo Laurhibar, de lo torrent de Larrau, lo caballo sin capeza ye una de las cosas que más temen los triballadors de la selba.
Lo caballo blanco u Zamarria Xurria se conoxe en las mugas de Zuberoa, Baxa Nabarra y Nabarra. A sobent ye por las bías de paso y de contrabando de caballos. La suya aparixión anunzia la muerte prosima. En Guipuzcua lo Zamaria Xurria ha preso la farcha d'un maniquí de caballo decorato con pelo e panollas e interbién en una danza folclorica.
