Alta Edat Meya
De Biquipedia
L'Alta Edat Meya ye o periodo dende a cayida d'o Imperio Román d'Oczident dica alto u baxo l'año 1000, epoca de renaximiento economico e cultural. Tres imperios combiben e luitan por a supremazía: o bizantino, l'arabe u islamico e o carolinchio.
Dende o sieglo III, a unidat politica d'o Imperio Román se crebó. En debilitar-se l'autoridat romana, os territorios imperials estioron embaditos por oleadas suzesibas de confederazions barbaras belas d'as cualas refusaban a cultura clasica de Roma mientres que atras, como os godos, l'almiraban e emulaban. D'os pueblos prominents que dentroron á lo territorio román estioron os unos, os bulgars, os abars, e os machiars, chunto á un gran numero de pueblos chermanicos e eslabos. Belas encursions se reyalizoron con l'aprobazión d'os romans: s'asinnaban á las tribus chermanicas tierras ta labrar e asentar-sen si luitaban con os romans como aliatos. En o sieglo V as instituzions d'o Imperio Román d'Oczident s'eba colapsato baxo a presión d'istas encursions. Anque sobrebibioron belas carauteristicas d'a organizazión gubernamental romana, se formoron dibersos gubiernos debils e locals u surtioron comandants melitars rechionals que se fazioron fuertes por l'ausenzia d'una autoridat zentralizara. Pero en a rechión oriental d'o imperio, muito más desarrollata, as instituzions de gubierno romanas zentralizatas continoron en operazión, en a imbenzible ziudat de Constantinopla. O Imperio Bizantino, ye dizir, o Imperio Román d'Orient, estió una continazión de l'Imperio Román cristián de l'antigüidat.
