Zibelemärit
Us der alemannische Wikipedia, der freie Dialäkt-Enzyklopedy
Der Zibelemärit isch ds Volksfescht, wo z Bärn am vierte Mänti im Novämber gfyret wird.
[ändere] Der Märit
Scho am Aabe dervor wärden ir Altstadt Ständ ufbbout. Der Märit vat sehr früech am Morge scho aa, u für ne Zibelezopf z übercho mues me früech gnue dört sy. Es wärde nid nume Zibelen aabbotte, sondern o alles mügleche Kunschthandwärch.
[ändere] Ds Volksfescht
Vom Morge bis spät ir Nacht geit ds Volksfescht. Es wird vil Konfetti gworfe. Zum Ässe git's näb em normale Volksfeschtässe o der Zibelechueche. Wil bi de Konfettischlachte näbe de Konfetti o Plastikhämmerli ygsetzt wärde, u wil's das unter Jugendtleche zimli ruuch cha wärde, isch ds Volksfescht vom Zibelemärit bi vilne nümm beliebt, wo z Bärn sy ufgwachse (im Unterschid zum eigentleche Märit, aber für dä mues men äbe früe ufstah).
[ändere] Gschicht
Es isch unklar, wie der Zibelemärit isch entstande. Aagäblich sölle Murtner vom Vischtelacherbärg de Bärner nachmene Stadtbrand ghulffe ha, so das si derfür mitmene spezielle Märit sy belohnt worde.