Mattenenglisch
Us der alemannische Wikipedia, der freie Dialäkt-Enzyklopedy
| Technische Yschränkung: Dr koräkt Titel wär: »Mattenänglisch« |
 |
Dialäkt: Bärndütsch |
Ds Mattenänglisch isch e Soziolekt vom Bärndütsche. Sy Name het nüt mit Änglisch z tüe, sondern mit sym Ursprungsort, em Bärner Mattequartier, bzw. der Mattenängi, wo ds traditionellen Unterschichtsquartier vo Bärn isch gsy. Syt sech im Louff vom 20igschte Jahrhundert d Bevölkerigsstruktur vo däm Quartier starch het veränderet, wird ds Mattenänglischen im Alltag nümm bbruucht. Es git aber e Verein, wo's bis hüt pflegt.
Inhaltsverzeichnis |
[ändere] Mattenänglischi Gheimsprach
Die mattenänglischi Gheimsprach glycht em Pig Latin, wo im änglische Sprachruum verbreitet isch. Es zeichnet sech aber bsunders derdür uus, das der erscht Vokal immer ganz ersetzt wird. Teil Lüt bezeichne nur die Gheimsprach als Mattenänglisch.
D Regle göh eso:
- Bi Wörter, wo mit emne Konsonant afö, wird dä Konsonant, bzw. ds ganze Konsonantecluster am Wortafang, a ds Wortändi bewegt. Hindedra chunt es ee, u der erscht Vokal wird ersetzt dür nes i. Bispil:
- Mueter → m-ueter → ueter-m → ieter-mee
- Schnure → schn-ure → ure-schn → ire-schnee
- Bi Wörter, wo mit emne Vokal afö, chunt hindedra es ee, bzw. es hee, we ds Wort mit emne Vokal ufhört, u der erscht Vokal wird ersetzt dür nes i:
- Änglisch → inglisch-ee
- Öpfu → ipfu-hee
Unbetonti Partikle blyben entweder unveränderet, oder si wärden als Bestandteil vo anderne Wörter behandlet, we si sech enklitisch a nes Wort alehne, bispilswys:
- gib ere → gibere → g-ibere → ibere-g → ibere-gee
[ändere] Mattenänglische Wortschatz
Der mattenänglisch Soziolekt het e Huuffe spezielli Usdrück gha. Zum Teil lat sech dä Wortschatz uf überregionali Gounersprache wi ds Jenische la zrüggfüeren oder uf ds Jiddische (bispilswys e Ligu Lehm für 'es Stück Brot'). E Groossteil vo däm Wortschatz wird hüt zwar nümm bbrucht, aber es paar mattenänglischi Wörter sy i ds normale Bärndütsch ufgnoh worde. Bispil:
- Jiu 'ja'
- Gieu (Giel) 'Bueb'
- Modi 'Meitschi'
[ändere] Literatur
Matteänglisch-Club Bärn: Matteänglisch - Geschichte der Matte, Dialekt und Geheimsprache, 8. Auflage, 2001
