Helvetia
Us der alemannische Wikipedia, der freie Dialäkt-Enzyklopedy
D Helvetia isch e Frau wo d Schwiz versinnbildlicht. Si werd miteme Schild wo s Schwizerchrüz druf isch und ere Lanze dargstellt. Ire Name laitet sich vo de Helvetier ab, wo früener im Schwizerische Mittelland gwont hend.
Z erschtmol isch im Joor 1676 e Frau, d "Eidtgenössische Dam", as Sinnbild vo de Aidgnosseschaft dargstellt wore. Noch de Propagierig vo de Helvetier as Vorfaare vo allne Schwiizer het die Daame de Name Helvetia öbercho und mit de Gründig vom moderne Schwizerische Bundesstaat 1848 isch iri Bidütig gstige. Si isch uf Münze und Briefmarke abbildet worde. Hüt isch si numeno uf de Füfzgerli, em Aifränkler und Zweefränkler abbildet. Degege stellt de Frauechopf ufem Füferli, Zeenerli und Zwänzgerli d Libertas ("Fraihait") dar.
De Name Helvetia stoot au uf de schwizerische Briefmarke, demit me nöd de Name i alne vier Landessprooche schriibe mue. Usem gliiche Grund het mer as Landeskennzaiche d Sigle CH gwäält, d Abchürzig vo Confœderatio Helvetica, em latinische Name vode Schwizerische Aidgnosseschaft.
De Name Helvetia werd i gwüssne Sprooche au för d Schwiz bruucht, so im Griechische (Ελβετία, Elvetía) oder Irische (An Elvéis).
[ändere] Galeri
 Briefmarke vom Joor 1882 |
 d Helvetia ufeme Zweefränkler |
 d Helvetia bim siniere uf de Riibrugg z Basel |
 |
 d Helvetia und d Geneva |
