Friedrich Silcher
Us der alemannische Wikipedia, der freie Dialäkt-Enzyklopedy
 |
Dialäkt: Schwäbisch |
Dr Friedrich Silcher (* 27. Juni 1789 en Schnait, + 26. Auguscht 1860 en Diebenga) isch a deitscher Kombonischt, Schriftsteller, Musiklehrer ond Konzertdirigent gwäa.
Inhaltsverzeichnis |
[ändere] Sei Leaba
Dr Philipp Friederich Silcher – so sei vollständiger Nama – wird am 27. Juni 1789 en dr Remsdalgmoid Schnaidt, wo heit zo Weinstadt ghört, gebora. Weil dô sei Vaddr, dr Johann Karl Silcher, Schualmoischtr isch, soll dr Jong au emohl dean Beruaf ergreifa. Wia dr Bua grad emohl 14 Johr alt ischt, schickt en sei Vaddr zom Ferdinand Auberlen noch Fellbach als „Schualknecht“ en d Lehr. Dobei muass ma wissa, dass dr Ferdinand Auberlen a ganz ô-gseanr Musiker isch, wo vo de Männergsangverei gschätzt wird, weil’r für dia viel Liadr en Noda gsetzt hot.
1806 kommt’r als Lehrghilf an-na Schual noch Schorndorf. Neabaher isch’r noh Hauslehrer vom Kreishauptmann Freiherr vo Berlichenga, ama Vorwandta vo sellem, wo durch da Goede ond weaga seira eiserna Hand so beriehmt worda isch. Dr Freiherr schätzt sein Hauslehrer ganz arg, ond wia-nr drei Johr spätr noch Ludwigsburg omziaht, losst’r sein ganza Eifluss spiela ond erreicht, dass dr Silcher a Stell bei dr Ludwigsburger Mädlesschual kriagt.
Mr muass wissa, dass Ludwigsburg seit 1718 d Hauptstadt vom Herzogtum Wirdaberg isch, seit dr Eberhard Ludwig uf Dränga vo seira Mätress Wilhelmine von Grävenitz d Residenz vo Stuegert deet no hot vorlega lau. Weil abr dr Hofadl et bloß ’s Wohl vom Land em Senn hot, sondern sich au nôch Luschdbarkeida sehnt, isch em Ludwigsburger Schloss a Theatr eibaut worda, wo oft Konzert ond Opra ufgführt werdet. So kommt’s, dass sich en Ludwigsburg zwoi berühmde Kombonischda ufhaldet, wia dr Silcher en dui Stadt ziagt: dr Carl Maria von Weber ond dr Badener Conradin Kreutzer. Dia zwoi lernt dr Silcher deet kenna ond freindet sich mit en ô. Boide mergat bald, was für a grauß musikalisch Käpsele dr Silcher isch. Se rôtet-em, er soll doch d Musik zo seira Lebensufgab macha.
Noch seira Ludwigsburgr Zeit folget zwoi Johr en Stuegert. Dô wohnt’r ondram gleicha Dach wia dr Conradin Kreutzer, nemlich beim Klavierbauer Johann Lorenz Schiedmayer. Obwohl’r jetzt a freier Musiker ond Musiklehrer isch, nemmt’r no Kombositionsonderricht bei seim Mitbewohner Kreutzer. Als deam sei Denscht en Stuegert aus ischt, setzt’r bei seim Nochfolger Johann Nepomuk Hummel da Onderricht fort.
Em Johr 1817 wird an dr Universidet Diebenga d Stell vo-ma Musikdirektr eigrichtet, ond dr Friedrich Silcher – er isch grad emol 28 Johr alt – isch dr erschte ibrhaupt, wo sich deet mit-em Titl „Universitätsmusikdirektor“ schmicka derf. Vo jetzt ô geit’r em evangelischa Stift ond em katholischa Konvikt Onderricht im mehrstemmiga Senga, hot ibrhaupt de ganz effentlich Musik zo leita, et bloß an dr Uni, sondern au em Seminarium. Obwohl’r mit dera Arbet eigentlich voll ausglaschdet ischt, komboniert’r no fleißig Klavier- ond Orglmusik, Orkeschtrouvertüra, Kammermusik, Klavierliadr ond so ganz nebaher sammlet’r no ibr 300 Volksliadr aus äller Welt ond richtet se zom Senga ei für Fraua-, Männer- ond gmischte Chör.
Wia dr Friedrich Silcher 33 Johr alt ischt, heiratet’r d Luise Enslin, wo a Dochter vom a Kaufmô aus Diebenga ischt. Em Lauf dr Zeit kriagt des Paar drei Kender: zwoi Mädla ond oin Bua.
1829 gründet dr Friedrich Silcher d „Akademisch Liedertafel“ in Diebenga. Dui isch de erscht rein studentisch Liadrtafel vo ganz Deitschland. Zeah Johr spätr folgt d Gründong vom „Diebenger Oratoriaverei“. A Novum en dr Gschicht vo dr Musik isch, dass zom erschta Mol au Fraua en so-ma Verei Miglied werda kennet.
Am 22. Septembr 1860 stirbt dr Friedrich Silcher en Diebenga em Altr vo 71 Johr. Begraba wird’r uf em alta Diebenger Stadtfriedhof.
[ändere] A kloina Auswahl vo seine Werk
[ändere] Biacher
- Melodien aus dem württembergischen Choralbuche dreistimmig für Schulen, Kirchen und Familien bearbeitet nebst einer kurzgefaßten Anleitung zum Choralgesange (1819 und 1824)
- Vierstimmiges Choralbuch für Orgel- und Clavierspieler (1828)
- Geschichte des evangelischen Kirchengesangs (1844)
- Gesanglehre für Volksschulen und Singchöre (1845)
- Harmonie- und Compositionslehre (1851)
[ändere] Liadr
Es send scho saumäßig viele Melodia, wo dr Silcher gschrieba hot, dass se dô omeglich älle ufgführt werda kennet. Dui kleina Auswahl, wo dô folgt, beschränkt sich deshalb uf a baar Liadr aus em süddeitscha Room:
- Am Necker, am Necker, dô ischt a jedes gern
- Durchs Wiesedal gang i jetzt na
- Zu dir zieht’s mi hin, wo i geh und wo i bin
- Wo a kleins Hüttle steht, ischt a kleins Gütle
- Wie han i doch so gern die Zeit, wenn’s Frühjohr wieder kommt
- Wenn alle Brünnlein fließen
- E bissele Lieb und e bissele Treu
- Rosestock, Holderblüt, wenn i mei Dirnderl sieh
- Muss i denn, muss i denn zum Städtele naus
- Mei Mutter mag mi net
- Mei Maidle hot a Gsichtle
- Alleweil ka mer net lustig sei
- Zu Straßburg auf der Schanz
- Jetzt gang i ans Brünnele
[ändere] Zwoi Werk für a grauß Orkeschtr
- Ouverture in c-Moll
- Ouverture in Es-Dur
[ändere] Beispiel für d Kammermusik
- Variationen für das Pianoforte über „Gib mir die Blumen“
- Variationen für das Pianoforte über das Volkslied "In einem kühlen Grunde"
- Divertissement für Flöte und Klavier aus dem "Freischütz" von C. M. v. Weber
[ändere] Ausgwählde Motetta
Sechs vierstemmige Hymna oder Figuralgesänge, op. 9, dô dren enthalta send
- Ehre sei Gott in der Höhe (Weihnachtsmotette)
- Schau hin nach Golgatha (Passionsmotette)
[ändere] Ehronga
- 1852 hot’r vo dr Universidet Diebenga da „Dr. phil.“ vorlieha kriagt.
- Am 8. Juni 1857 hot en dr Schwäbische Sängerbond zo seim Ehramitglied ernannt.
[ändere] Gsangbuach
Vo seine Choräl fendet sich heit noh em Evangelischa Gsangbuach:
- So nimm denn meine Hände (Nr. 376) em überregionala Toil ond
- Womit soll ich dich wohl loben, mächtiger Herr Zebaoth (em regionala Toil für Wirdaberg, Nr. 606)
[ändere] Museum
Em Silcher sei Geburtshaus en Weinstadt-Schnait isch vom Schwäbischa Sängerbond zo-ma Museum ausbaut worda. Em Mittlponkt stoht dobei natierlich ‘s Leaba ond Wirka vo deam graußa schwäbischa Musiker.
[ändere] Litradur
Hermann Josef Dahmen: Friedrich Silcher, Komponist und Demokrat; a Biografie, 1989 erschiena em Thienemann Verlag Stuegert (Edition Erdmann), ISBN 3522626508
[ändere] Tonträger
A Querschnitt durch sei musikalischs Schaffa geit dui CD „Loreley – Chöre, Kammermusik, Ouvertüren“. Ausführende send ‘s Radio-Sinfonieorkeschtr Stuegert onder dr Leidong vom Uros Lajovic, em Südfunk-Chor onder dr Leidong vom Rupert Huber, dr Robert Dohn, Flöt, ond d Susan Wenckus, Klavier. Carus Digital Recording Nr. 83.119. Dui CD enthält au a omfangreichs Booklet mit ma Lebenslauf ond viele entressante Sacha.
