Churfirsten
Us der alemannische Wikipedia, der freie Dialäkt-Enzyklopedy
| Technische Yschränkung: Dr koräkt Titel wär: »Churfürste« |
| Churfirste | |
|---|---|
|
|
|
| Höchi: | 2306 Meter |
| Geografischi Laag: | 47° 9' N, 9° 18' O |
| Laag: | Schwiz |
D Churfirschte oder Churfürschte (IPA: [ˈxuːrfʏrʃtə]) sind e Chetti vo sibe relatiiv junge Chalchstaiberge. Si laufet im Norde nöd allzu gääch is Toggeburg us, im Süde aber fallets fast senkrecht in Walesee (419 m.ü.M) ab. Si sind s Woorzaiche vom Toggeburg.
D Näme vode sibe Churfürste sind vo Oste noch Weste: de Chäserrogg (IPA: [ˈxæsərʊk]; 2262 m), de Henderrogg (IPA: [ˈhɪnd̥ərʊk]; 2306 m), de Schiibestole (IPA: [ˈʃiːb̥əʃtolə]; 2234 m), de Zuestole (IPA: [ˈtsʊə̯ʃtolə]; 2235 m), de Brisi (IPA: [ˈb̥rɪsi]; 2279 m), de Frümsel (IPA: [ˈfrʏmsəl]; 2263 m) und de Seluu (IPA: [selˈuː]; 2205 m). D Bergchetti setzt sich den in Weste fort mit: Wart (2068 m), Schääre (2171 m), Nägeliberg (2163 m) und Liistchamm (2101 m).
Am Seluu isch s Wildemannliloch, e Höhli wo ide Staizitt benutzt woren isch. Me ninnt au aa, ass de Johannes Seluner i dere Höhli glebt gha het.
Vo Unterwasser us fart e Standsailbaa uf de Iltios (IPA: [ɪltiˈo:s]) und vo döt us schwebt e Gondelbähnli uf de Chäserogg, wos e Restarant anegstellt hend. E Schiipiste för güebti Schiifahrer füert zrugg an Iltios wos au Schiilift för Afänger het. Well de Berg uf drai Site stail abfallt, tar Piste uf kann Fall verlo werde. Im Summer werd en Erwanderig vomene Churfirst mitere prächtige Uusicht über d Alpe und de Bodesee belohnt.
