Andelfingen
Us der alemannische Wikipedia, der freie Dialäkt-Enzyklopedy
Andelfinge (PLZ: 8450) lyt im Zürcher Wyland und isch Bezirkshauptort mit ere alte kattolische Chile und em Bezirksgricht, emene Chnootebahnhof (sit em Dezämber 2006 haltet au di neu S16 z'Andelfinge) und au es alts Schloss und es grüümigs Schwümmbad ghöred dezue. Andelfinge hätt e Nachbersgmeind Chlii-Andelfinge (PLZ: 8451), wo mal hätt wele fusioniere mit Andelfinge, aber das isch bim Traum vo de Chlii-Andelfinger plibe. Andelfinge und Chlii-Andelfinge wärded dur di historisch Thurbrugg trännt, wo dur Liechtsignal gschtüüret wird und nur eischpuurig befahrbar isch (Welo und Fuessgänger chönd separat d'Brugg überkwäre). Zu Andelfinge ghört au no's Puuredörfli Alte. De Märtplatz vo Andelfinge zeichnet d'Ortschaft rächt guet uus, vill lang iigsässni Gschäfter händ det ihren Sitz wie zum Biischpiil de Beck Gnädiger, de Schueh-Peyer, de Volg, d'Metzg vom Schäuble, d'Babetterie Fischli oder's Reisebüro am Märtplatz.
Wiiteri Gmeinde um Andelfinge ume sind Adlike, Ossinge, Flaach, Dorf, Huemlike und Hänggert. D'Sekundarschüeler vo Oberwil, wo eigentli i de Gmeind Dägerle liit, gönd au no z'Andelfinge i'd Schuel. Die übrige Dägerler (also Ruetschwil, Dägerle sälber, Bärg und Bänk) müend uf Seuzach i d'Oberschtuufe.
