Storia de la Somalia
Da Wikipedia, ła ençiclopedia libara.
Anca se no ghe mai stà ricatamenti paleontologici de interese, sicuramente l’omo de età preistorica el gha visù en te la region che ora ciamemo Somalia. I stesi abitanti de la Somalia i xe de origine axiatica, a dimostrazsion de na longa storia de pasajo de popoli da la penisola arabica a le zone del Corno d’Africa. Le coste de la Somalia le xe sempre stà feequentade da popoli mediteranei. I egizsiani i gha mandà de le spedizsioni, i greci e i romani i vegnea fin qi, e fin a le coste del Kenya atuale, par comprar mira e incenso. Ma no ghe notizsie pi precise so i popoli e la loro storia.
Indice |
[modifica] Medioevo
I primi documenti so la Somalia i vien dal mondo arabo. El viagiator ibn Battuta (1331) el gha visità la Somalia durante el so girovargar par l’Africa. Anca la spedizsion del general cinexe Zheng He (1417-19) la xe rivà so le coste de la Somalia. Battuta el riferise che Mogadiscio el gavea on gran marcà e che le lane tesute da i somali le vegnea vendude longo tuta la costa fin a l'Egito.
[modifica] Islam
L’Islam el se sa propagà en Somalia fin da i primi secoli dopo Maometo. I musulmani de la Somalia i gha sempre rispetà el regno cristiano de l’Etiopia parché i etiopici i gavea salvà i primi muslmani scampà la par scapar a la persecuzsion, e Maometo gavea meso na fatwa contro ghi agrediva el regno Etiopico. Tra el 1300 e el 1400, el regno etiopico e el sultanato de Harrar i gha combatuo en tel nord de la Somalia. En tel 1415, l’imperatore Yeshaq I el gha caturà el re Sa’ad ad Din e lo gha fato copar. El gha fato anca scrivar on poema par ricordar i gesti epici de la so vitoria. I etioipici i gha controlà la zona per pi de on secolo.
En tel 1527, el capo carismatico de na seta islamica, Ahmed Gurey, el gha fato n’aleanzsa co i otomani turchi e invaso l’Etiopia. I soldai de Gurey i faxea tera brusada do i arivava e i gha bruxà la majoria de i manoscriti etioipici che i gha catà. L’invasion la xe stà fermà da l’arivo de i portoghexi soto la guida de Cristoval da Gama, fiol del pi famoxo Vasco. El 21 fevraro 1543, i etiopici e portoghexi i gha vinto la bataja de Wayna Daga, Ahmed Gurey el xe stà copà, e la guera co i musulmani vinta da l’Etiopia. El regno somalo (regno de Adal) el se sa disintegrà en tanti stati picoleti ligà a i porti longo la costa. Tanti de sti porti i xe finii soto el control de fameje yemenite.
En tel XIV secolo, en tel sud de la Somalia, la dinastia Ajuuran la gha creà n’altro regno en te la val de Shabeelle. El regno de i Ajuraan el xera pi potente de le sità stato de Mogadisio, Merka e Baarawe. El sboco al mar el xe garantì da el porto de Hobyo. Co i re i gha perso el control de Hobyo dopo la rivolta de i seichi locali, el regno el gha perzso importanzsa par somparir a la fine del XVII secolo. I omaniti i xe riusidi a parar via i portoghexi da Benaadir e tor el control de la costa. Soltanto en tel XVIII secolo n’altro regno somalo el xe nato en tel sud. El sultanato de Geledi el controlava la zona de Shabeelle. I omani i gha lasà far. En tel nord, el sultanato de Warsangeli el xe diventà el i grande rgno mai esitì en Somalia. El controlava n’area del nord e parte del sentro da la Somalia moderna.
[modifica] Colonialismo
I inglexi i gha sempre avù on groso interese su la costa de la Somalia. I pagava el sultan de Warsangeli parché jutase i marinai inglexi che faxea scalo so le coste. I gha mandà do esploratori, Richard Burton and John Speke a esplorar l’interno in vista de n’invasion. L’esplorazsion no la xe mia riusia come i volea, ma Speke el xe stà bon de registrar tanti fati de la vita de la zente del posto. Altri esploratori mandà da el goerno o da società geografiche i xe stà boni de visitar l’interno, ma nisuno el xe stà bon de dar notizsie certe e complete su la Somalia. Francia, Regno Unio e Italia i gavea de le rivendicazsioni su el Corno d’Africa. I inglexi i volea sopratuto el control de el streto de mar rente a Aden. I francexi i volea fermar la supremazsia inglexe so la regione. I italiani i volea verghe de le colonie, ma tuti i posti pi importanti i xera za stà ciapà da i altri. I britanici i gha stabilì el protetorato en tel nord en tel 1886. L’Italia la gha ocupà parte de la costa a sud en tel 1892, e la Francià la sa tolto el teritorio rente a la sità de Gibuti. Fin al 1925, l’Italia la controlava solo na parte del teritorio e la gavea de i tratati de protezsion co i sultanati. Co l’arivo de i fasisti de Benito Musolini, l’Italia la gha scominzsià na serie de guere par conquistar e controlar tuto el teritorio somalo. La colonia la xe resistia fin al 1942. La Somalia la xe alora pasà al controlo britanico e la xe ritornà al mandato italiano fin al 1960, co l’indipendenzsa del paexe.
[modifica] Guera e ditatura
Subito dopo l’indipendenzsa, la Somalia la gha combatù contro l’Etiopia par el teritorio de l’Ogaden. Questo el xe on teritorio arido e abità da popoli de etnia somala, ma da secoli parte de l’Etiopia. Le do guere le xe finie co la vitoria etiopica. En tel 1969 el generale Sida Barre el gha fato on colpo de stato e el xe salì al poter. Ne i promi ani ’80, vari grupi de guerilieri i gha provà a butar zo Barre. La guerilia la continua fin a ancò. Barre el gha scapà el tel 1991 e la guerilia la xe andà cresendo de forzsa, fin a metar tuto el paexe en stato d’asedio. En tel 1994, l’ONU la gha provà a controlar la situazsion co l’operazsion Restore Hope, anca l’Italia la gha mandà le so trupe. La mision de l’ONU la xe falia. En tel 2004 el proceso de paxe el sembrava ndar ben. I paexi de l’IGAD, l’organizazsion inter governativa de i paexi del Corno d’Africa che la gavea anca laorà par la paxe en tel Sudan, i gha provà a mediar la situazsione somale co vari incontri a Eldoret e a Mbagathi, en Kenya. Tuti i clan i gha firmà i acordi de paxe e eleto Abdullah Yusuf presidente ad interim e Mohamed Gedi come primo ministro. De fato, el novo governo no el xe mai stà bon de entrar ne la cavedal e nianca a far sentir la so autorità so tuto el teritorio (la Somalia del Nord la se sa costituià stato indipendnete en tel 1994, e Puntland – en tela region sentrale – la xe sempre rimasta fora da i problemi del sud). L’ultima crisi la xe sciopà en tel 2006 co l’arivo de le Corti Islamiche, grupi de integralisti islamici, che i gha fato scapar i signori de la guera da Mogadiscio. L’Etiopia la xe entrà ne la cavedal par par via i fondamentalisti, che i xe scapà en Eritrea. L’Union Africana la gha mandà (fine 2006) le trupe de l’Uganda, che no le xe mia stà bone de ristabilir l’ordine ne la cavedal. Ancò, la cavedal la xe en continuo subulio e el governo provisorio nol gha mia control del teritorio.
Portałe Africa: varda łe altre voxe de Wikipedia che łe parla de Africa
