Parcu Archiòloggicu dâ Neapolis di Sarausa
Di Wikipedia, la nciclupidìa lìbbira.
Lu Parcu Archiòloggicu dâ Neapolis (dû grecu "nova cità "), vinni rializzatu tra lu 1952 e lu 1955 p'arricògghiri nta n'ùnicu cumpressu li cchiù granni munumenta clàssichi di l'èbbica greca e rumana ca s'attròvunu nta st'anticu quarteri Neapolis di Sarausa .
Apprima dâ custituzzioni dû "Parcu" di 240.000 mq., ss'ària era spartuta nta tanti pruprità privati e li munumenta s'attruvavanu picciò sparpagghiati nta tutti ssi pruprità.
Appena si trasi ntô parcu, s'attrova la "Basìlica di S. Niculò dê Curdari" (XI sèculu d.c.), unni oggi c'è misu n'ufficiu turìsticu.
Misu quasi 'n facci a la basìlica, c'è l'"Anfitiatru Rumanu" (II-IV sèculu d.c.),una di li rializzazzioni cchiù rapprisintativa dâ prima etati mpiriali rumana.
Vicinu a l'Anfitiatru, cchiù a ovist, s'accontra l'"Ara di Ierone II" (III sèculu a.c.), ca rapprisenta la terza granni òpira munumentali ca ni vinni di l'anticu quarteri di la Neapolis .
Cchiù avanti, vicinu ô "Tiatru Grecu" (V sèculu a.c.), ca è lu cchiù granni tiatru dâ Sicilia e unu dê cchiù granni di tuttu lu munnu grecu, s'ancòntranu li "Latumii" , e tra chissi chidda cchiù ntirissanti è la "Latumia dô Paradisu" , di unni s'arriva a la cchiù famusa dê grutti di stu parcu: chidda chiamata "Aricchiu di Diunisiu", ca è l'attrazzioni cchiù granni, nzemi ô tiatru grecu, pî turisti ca vènunu a Sarausa.
Fora dû ricintu dô Parcu Archiòloggicu, cchiù a Sud, ô principiu dâ strata chiamata Via Panuramica ca porta 'n cima ô "colli Temeniti", c'è nu Tiatru Arcàicu scavatu ntâ petra cu cavea rittilinia aveci ca curva, chiamatu "Tiatru Liniari".
Sempri fora dû parcu, ntê lìmiti urientali, ô ncrociu tra viali Teracati e via Romagnoli, c'è la "Nicròpuli Gritticeddi", cu li numirusi tombi scavati ntâ petra, tra chissi c'è chidda ditta "Tomba di Archimedi".
| Siti archiològgichi dâ Sicilia | |
|---|---|
 |
Adranon (Adranu) • Akragas (Girgenti) • Akrai (Palazzolu Acrèidi) • Antichitati di Catania • Cullina di Sant’Ippòlitu • Castellucciu • Catacombi di Sarausa • Cefalù • Centuripe • Colle Madore • Eloru • Eraclea Minoa • Imera • Isole Egadi • Isole Eolie • Kamarina • Marsala • Megara Hyblaea: • Mozzia • Panormo (tutto porto) • Sammuca Zabut. • Monte Adranone • Seggesta • Parcu Archiòloggicu dâ Neapolis • Pantalica • Silinunti • Ustica • Villa Rumana dû Casali (Chiazza) • Villa Rumana di Castruriali • Villa rumana dû Tellaru |
