Giuvanni Verga
Di Wikipedia, la nciclupidìa lìbbira.
Giuvanni Verga (Catania o Vizzini 1840 - Catania 1922) fu unu dî scrittura italiani cchiù mpurtanti dû XIX sèculu.
Ìndici |
[cancia] Natali di Verga
Lu paisi di Vizzini hà circatu tanti voti di attribbuìrisi la nàscita dô scritturi nta ssu paisi, di unni la famigghia Verga avìa appartinenza a la nobbirtà antica e unni era prupritaria di tirreni 'n cuntrata Tébidi, ma nta nu ducumentu di l'8 di sittèmmiru 1840 di l'archiviu arciviscovili di Catania, veni attistatu ca la nàscita di Giuvanni Verga avìa stata "rivilata" nta ddu stissu jornu nzemi ô battìsimu ntâ cresia dî Santi Apòstuli, 'n prisenza di dui patrini, li zii don Giuseppi e donna Dumìnica Verga; ppi contru, pi sustiniri la nàscita di Verga a Vizzini, nuddu ducumentu arrisurta ca s'hà ammustratu nzinu a oggi. La famigghia Verga, ô tempu dâ nàscita di Giuvanni, stava di casa a Catania, a Via Sant'Anna n.8, unni ora c'è lu museu Riggiunali "Giovanni Verga".
[cancia] Narrativa
Si fici canùsciri comu nu littiratu vicinu â currenti dâ scapigghiatura e poi comu scritturi verista ca discrissi abilimenti la vita dî campagnoli e dî piscatura siciliani. Li sò òpiri spissu hannu statu utilizzati pi lu cìnima. Ricurdamu I Malavoglia e Mastro don Gesualdo. Lu film La terra trema di Luchino Visconti, di ispirazzioni verghiana, fu lu primu film giratu cumpletamenti in sicilianu.
[cancia] Tiatru
La sô attività littiraria granni cumprenni puru na fasi tiatrali carattirizzata di na dicina di òpiri ntra li quali Vita dei Campi (1880), La lupa dû 1884 e Dal tuo al mio dû 1903. Digna di èssiri ricurdata è la "Cavalleria Rusticana": Verga la scrivìu nizzialmenti comu n'episodiu dû rumanzu "I Malavoglia" ma doppu la pubblicau dintra "Vita dei Campi" e nni fici un dramma tiatrali nta n'attu ùnicu (1884); Ntô 1890 Pietru Mascagni la musicau e addivintau na famusa òpira lìrica.
Murìu ntô 1922.
