Gobernador di Aruba
Di Wikipedia, e ensiklopedia liber
Facultadnan di e Gobernador ta subdividi den e facultadnan asigna na su persona mediante ley como Organo di e Reino y como Organo di e Pais.
E Gobernador ta representa e gobierno di Reino. Como Organo di Reino e ta cuida interes general di Reino, e ta encarga cu implementacion di Leynan cu ta conta pa henter Reino (Leynan di Reino), Decretonan Real Administrativo y tratadonan internacional y e ta eherce vigilancia riba cumplimento di esakinan. Ciudadanonan ta haña nan ta trata den e cuadro aki principalmente cu e implementacion di e Ley di Paspoort door di e Gobernador (dunamento di documentonan di viahe y visa) y e implementacion di e Ley di Reino riba nacionalidad hulandes (naturalisacion y opcion).
E Gobernador ta representa tambe e Rey na Aruba y esaki ta haci'e hefe di e gobierno di Aruba. E Gobernador ta gosa di inmunidad y ta eherce su facultadnan bou e responsabilidad di e ministernan, kendenan na nan turno mester duna cuenta na Parlamento.
E Gobernador ta representa e Rey den caso di entréga di condecoracionnan real y e inauguracion di Parlamento. E ta responsabel pa e formacion di un gabinete, ta ratifica Ordenansanan di Estado y Decretonan di Estado y ta responsabel pa e nombramento, huramentacion y retiro di algun alto dignatarionan manera minister, miembronan di Ministerio Publico y e Procurador General. Tambe, como hefe di estado, e Gobernador por concede pordon total of parcial di un pena of conmuta esaki y e por duna permiso na avion y embarcacionnan militar di un potencia stranhero para drenta espacio aereo of awanan territorial di Aruba.
[editá] Lista di gobernadornan
- E prome Gobernador di Aruba tabata señor F.B. Tromp. A nombr'e mediante Decreto Real di 27 di sèptèmber 1985 no. 16 drentando na vigor dia 1e di Yanüari 1986.
- E di dos Gobernador di Aruba tabata señor mr O. Koolman. A nombr'e mediante Decreto Real di 28 di Yanüari 1992 no. 92.000904 drentando na vigor dia 29 di Yanüari 1992.
- E di tres y actual Gobernador di Aruba ta Gobernador Refunjol. A nombr'e mediante Decreto Real di 4 di mei 2004 no. 04.001780 drentando na vigor dia 1e di mei 2004.
[editá] Link exterior
Website oficial di Gobernador di Aruba [1]
